Azərbaycan qrossmeysterləri sürətli şahmat üzrə dünya çempionatında iştirak edirlər
Bakı, 12 oktyabr, AZƏRTAC
Berlində sürətli şahmat üzrə dünya çempionatı start götürüb.
AZƏRTAC xəbər verir ki, çempionat İsveçrə sistemi üzrə 15 turdan ibarət keçirilir. Ümumilikdə 46 ölkədən 158 şahmatçının qələbə uğrunda mübarizə apardığı çempionatda Azərbaycanı beynəlxalq qrossmeysterlər Teymur Rəcəbov, Şəhriyar Məmmədyarov, Rauf Məmmədov, Qədir Hüseynov, Eltac Səfərli və Namiq Quliyev təmsil edirlər.
On turdan sonra dünya çempionu Maqnus Karlsen və Belarus şahmatçısı Sergey Jiqalko hərəyə 8 xal toplayaraq turnirə liderlik edirlər.
Həmyerlilərimiz Rauf Məmmədov, Teymur Rəcəbov və Şəhriyar Məmmədyarov 7 xalla 9-11-ci yerləri bölüşdürürlər. Eltac Səfərli və Qədir Hüseynov isə 6 xalla 34-35-ci pillədə qərarlaşıblar. Namiq Quliyev isə aktivinə 3,5 xal yazaraq 131-ci yerdə qərarlaşıb.
Sürətli şahmat turniri oktyabrın 12-də başa çatır.
Oktyabrın 13-14-də isə blits turniri keçiriləcək.
Bölmənin digər xəbərləri
