AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB HEYDƏR ƏLİRZA OĞLU ƏLİYEVƏ
Bismillahir-rəhmanir-rəhim!
Möhtərəm cənab Prezident!
Biz, Qafqaz Müsəlmanları İdarəsinin qazıları, səlahiyyətli nümayəndələri və Elmi-Dini Şuranın üzvləri, yüksək ehtiram, rəğbət və dərin minnətdarlığımızı Zati-alilərinizə bildirməkdən böyük şərəf duyur, Sizə möhkəm cansağlığı, uzun ömür, Azərbaycanın xoşbəxt gələcəyi naminə əvəzsiz fəaliyyətinizdə müvəffəqiyyətlər və uğurlar diləyirik.
Azərbaycanın çoxəsrlik tarixində hələ elə bir dövlət xadimi olmayıbdır ki, Heydər Əlirza oğlu qədər, xalqımızın dərdləri və sevinci ilə yaşasın, ömrünü Vətənin qüdrətinə həsr etsin, dilinə və dininə qiymət versin, xaricdən və daxildən törədilən bütün çətinliklərə baxmayaraq yenilməz iradə ilə müstəqillik siyasətini həyata keçirsin. Biz dindarlar üçün ən önəmlisi odur ki, nəhayət ki, millətinə, onun tarixinə, dininə Heydər Əliyev qədər ehtiramla yanaşan, diqqətli münasibət bəsləyən dövlət başçımız vardır.
Siz, cəmiyyətin mənəvi durumuna, çoxəsrlik milli, mənəvi-əxlaqi dəyərlərin intibahına, insanların dini tələbatlarının təminatına xüsusi qayğı ilə yanaşırsınız. Həqiqətən, öz milli köklərini, adət-ənənələrini, dilini unudan xalq və dövlət məhvə məhkumdur. Siz belə proseslərin gedişatını bütün incəlikləri ilə duyursunuz və buna görə də böyük uzaqgörənlik və müdrikliklə bu sahədə dövlət səviyyəsində əməli tədbirlər həyata keçirirsiniz.
Bu baxımdan, Sizin 13 avqust 2001-ci il tarixli bəyanatınız bir daha təsdiq edir ki, Zati-aliləriniz cəmiyyətin mənəviyyatının saflığı və paklığına nə dərəcədə yüksək önəm verir. Biz bir daha şahid oluruq ki, əsl xalq rəhbəri kimi Siz hər sahədə, o cümlədən millətin mənəviyyatı sahəsində də gələcəyimizin təminatçısısınız.
Azərbaycanımızın, bütün Qafqazın dini rəhbərinin çirkin niyyətlə mətbuatda təhqir olunmasını, ümumiyyətlə, müqəddəs dini dəyərlərimizə, mənəviyyatımıza qarşı yönəldilən təxribat kimi qiymətləndirərək, Zati-aliləriniz olduqca vacib məqamlara toxunmuş, bu məsələnin əsl mahiyyətini, bu sahədə hər birimizin məsuliyyətini dəqiq və mükəmməl surətdə vurğulamışdır.
Müstəqilliyimiz və dövlətçiliyimizin düşmənləri Azərbaycanımıza zərbə vurmaqdan ötrü heç bir vasitədən çəkinmirlər. Bu vasitələr arasında mənəvi təcavüz əlahiddə yer tutur. Təcrübə göstərir ki, mənəvi təcavüz hərbi qarşıdurmadan daha təhlükəli olub, daha dağıdıcı, fəlakətli nəticələrə gətirib çıxarır. Çünki bu halda, insanların ruhu öldürülür, xalq öz çoxəsrlik tarixi ənənələrindən, soykökündən ayrı salınır.
Şeyxülislam Hacı Allahşükür Paşazadə həzrətlərinin şəxsiyyətinə toxunanlar mənəviyyatımıza zərbə vurmaq, onun təməllərini daha da sarsıtmaq məqsədi daşıyırlar. Möhtərəm Şeyximiz mənəvi saflığımız, dini dəyərlərimizi yad ünsürlərdən qoruyub saxlamaq uğrunda daim sədaqətlə fəaliyyət göstərir.
Çox təəssüflər olsun ki, müstəqilliyin bizə bəxş etmiş olduğu demokratiya və azadlıq kimi nemətlərdən sui-istifadə edərək mənəviyyatımıza güclü zərbələr endirilir. Ən dəhşətlisi odur ki, milli adət-ənənələrimizə, dünyagörüşümüzə, həyat tərzimizə zidd olan bir çox mənfi hallar yer alıbdır. Həm Qərbdən, həm Şərqdən ölkəmizə “təşrif buyurmuş” emissarlar keçid dövrünün müvəqqəti çətinliklərindən istifadə edərək adamları doğru yoldan yayındırır, qarşıdurma yaratmaq məqsədi ilə müxtəlif təxribatlara əl atırlar.
Möhtərəm cənab Prezident!
Biz, Azərbaycanın din xadimləri, elmi ictimaiyyətinin nümayəndələri bu xoşagəlməz vəziyyəti dərk edərək əlimizdən gələni edirik ki, mənəviyyatımızı bu növ zərbələrdən qoruyaq, bununla da Azərbaycan dövlətini sarsıtmaq məqsədi güdənlərə layiqli cavab verək.
Biz, Azərbaycan dindarları, özümüzü Vətənimizin həyatından, gündəlik problemlərindən, xalqın qayğılarından heç zaman ayırmamışıq. Bir dövlət başçısı kimi, əmin ola bilərsiniz ki, Azərbaycan dindarları Sizin tarixi bəyanatınızı ürəkdən dəstəkləyərək, xalqımız naminə gördüyünüz işlərdə Sizə daima yardımçı olacaq, Vətənimizin sağlam tərəqqisi yolunda mümkün olan xidməti göstərəcəklər. Bizim hamımızın bir ümdə məqsədimiz, amalımız vardır. Bu məqsəd, bu amal - doğma Azərbaycanımızı beynəlxalq birlikdə müstəqil, bütöv, hörmətli, yüksək mənəviyyata malik bir dövlət kimi görməkdir.
Ümidvarıq ki, Allahın köməyi ilə və müdrik dövlət başçımız Heydər Əlirza oğlu Əliyevin rəhbərliyi altında bu istəyimizə yetişəcək, Zati-alilərinizlə birlikdə müstəqil dövlətimizin yeni-yeni uğurlarına sevinəcəyik.
Allah köməyiniz olsun!
Dərin hörmət və ehtiramla,
Qafqaz Müsəlmanları İdarəsinin Qazılar
Şurası, Elmi-Dini Şurasının üzvləri və
səlahiyyətli nümayəndələri
Bakı şəhəri, 18 avqust 2001-ci il
Bölmənin digər xəbərləri
