RƏSMİ XRONİKA
AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB HEYDƏR ƏLİYEVƏ
Bu gün məmləkətimizin hər yönünə qayğılarının başdan aşdığı bir zamanda Sizin vaxt tapıb istər yaşamaqda olan, istərsə də dünyasını dəyişmiş sənətkarlarımıza, elm, mədəniyyət xadimlərimizə göstərməkdə olduğunuz həssas münasibətiniz xalqın həm özünüdərkində, həm dövlətçiliyimizin məna və mündəricə tutumunda düşündürücü unudulmaz örnəklər sərgiləməkdədir.
Türk varlığının mənəvi memarlarından Ədəbalı həzrətləri Osman Qaziyə nəsihətlərinin birində deyirdi ki, “İnsanı yaşat ki, dövlət yaşasın!”. Xalqımızın irəli çıxmış çoxsaylı seçkin insanlarına Sizin yüksək qayğılarınız o böyük şəxslərlə bərabər məhz dövlətimizin yaşamasına, onun əbədiyyətinə xidmət göstərir.
Möhtərəm Prezidentimiz!
Elm, incəsənət xadimlərimizə qayğı və diqqətiniz bütünlüklə soyumuzun ümumi-mənəvi birliyinə Sizin unudulmaz ərmağanınızdır. Bu günlərdə respublikanın əməkdar incəsənət xadimi, bədii sözümüzün əvəzsiz zərgəri, sazımızın böyük pərvanəsi, Kəlbəcərin fəxri və adı yurdumuzun bədii ünvanına çevrilmiş Aşıq Şəmşirin anadan olmasının 110 illiyinin respublikamızda geniş qeyd olunması haqqında verdiyiniz Sərəncamınız biz kəlbəcərliləri xüsusilə sevindirmişdir. Böyük insanlar, yaradıcı şəxsiyyətlər unudularsa, xalq çox şeydən məhrum olar.
Möhtərəm Prezidentimiz!
Aşıq Şəmşir ən çətin güzəran və qarışıq dövranlar məngənəsində ürəyini şam etmiş, mənəvi dəyərlərimizin mübarək cərgəsində özünə yer və mövqe qazanmış klassik aşığımız, həmişəyaşar şairimizdir. Unudulmaz sənətkarımız fəxriyyələrinin birində xalqı, milləti üçün öz mənəvi dəyərini belə dilə gətirirdi: İtməz, rüzgarlarda qaldı nişanam, Ellərin dilində ölməz dastanam! İstəkli olana şirin zəbanam, Şəmşirin dilinə dil çata bilməz! Bu tutu dillə, bu böyük dünyası ilə millətimizin ulu sənətkarı, Sizi də yeri gəldikcə tərənnüm etməkdə idi, möhtərəm Prezidentimiz!
Azərbaycanımın igid oğluna, Qızıl Ulduz qoşa-qoşa yaraşır! Alqış kamalına, alqış ağlına! Zərli tac kamallı başa yaraşır! – deyə, Dədə Şəmşir Sizin xalq üçün, dövlətimiz üçün yorulmaz çoxsaylı və genişüfiqli xidmətlərinizi bədii sözün qüdrəti ilə tərənnüm etmişdir.
Doğrudan, sənət təsəvvürə belə sığışmayan bir iksirdir. Bu gün yağı caynağında, faşist əsarətində olan Kəlbəcər Dədə Şəmşirin həmişəbahar poeziyasından dipdiri şəkildə bizə boylanır və böyük zəfərlərimizə qədər camaatımıza əvəzsiz təsəlli təsiri bağışlayır.
Möhtərəm Prezidentimiz!
Sizin bu tarixi Sərəncamınız işğal altında olan Kəlbəcərimizin onsuz da kövrək və hər cür təsəlliyə ehtiyac duyan əhalisinə və ümumən məmləkətimizin poeziyasevərlərinə çox dəyərli müjdə oldu.
Bunun üçün Sizə tükənməz minnətdarlığımızı çatdırmağı özümüzə borc bildik.
Ömrünüz uzun olsun! Xalqımız və dövlətçiliyimiz naminə Sizə ağrısız-acısız, yüksək qayəli, işıqlı fəaliyyət arzulayırıq!
Kəlbəcər ziyalıları adından dərin hörmət və sayğılarımızla: Bəhmən Vətənoğlu - şair, Məmməd Aslan - şairŞahlar Əsgərov - Milli Məclisin deputatı, professor və başqaları. Cəmi 27 imza.