Sizi Azərbaycan Respublikasının Prezidenti vəzifəsində fəaliyyətinizin bir ilinin tamam olması və dövlət müstəqilliyimizin 13-cü ildönümü münasibətilə Milli Məclisin deputatları adından və şəxsən öz adımdan səmimi qəlbdən təbrik edir, ümummilli liderimiz Heydər Əliyevin ərməğanı olan müstəqil Azərbaycan dövlətinin daha da möhkəmləndirilməsi və inkişaf etdirilməsi naminə gördüyünüz nəhəng işlərdə Sizə yeni-yeni uğurlar arzulayıram!

İstiqlaliyyətin 13 illiyini qeyd edərkən xalqımızın azad, müstəqil, suveren dövlətini qurmaq üçün keçdiyi yola, bu yolda qarşılaşdığı çətinlikilərə, qazandığı nailiyyətlərə bir daha nəzər salırıq. Azərbaycanın ən yeni tarixinin bütöv bir dövrü ümummilli liderimiz Heydər Əliyevin adı ilə bağlıdır. Onun respublikaya ilk dəfə rəhbərlik etdiyi 1969-1982-ci illərdə dahiyanə idarəçilik qabiliyyəti və gərgin zəhməti sayəsində ölkəmiz iqtisadiyyatda, elmdə, mədəniyyətdə, təhsildə - həyatın bütün sahələrində coşğun tərəqqi dövrü yaşadı. Azərbaycan qısa müddət ərzində əsrə bərabər inkişaf yolu keçdi. Ümummilli liderimizin yaratdığı əlverişli şərait cəmiyyətin potensial qüvvəsini hərəkətə gətirdi, bunun nəticəsində xalqımızın milli mənlik şüurunda böyük oyanış baş verdi. Məhz həmin dövrdə Heydər Əliyevin uzaqgörənliyi və müdrikliyi sayəsində Azərbaycanın gələcək dövlət müstəqilliyi üçün əsaslı zəmin və möhkəm bünövrə yaradıldı.

XX əsrin sonlarında xalqımız yenidən istiqlaliyyətinə qovuşduqdan sonra məhz Heydər Əliyevin dühası və iradəsi sayəsində bu müqəddəs neməti qoruyub saxlaya bildi. Dövlətçiliymizin müqəddəratının həll edildiyi, azadlığımızın və müstəyqilliyimizin müdhiş təhlükə ilə üzləşdiyi 1993-cü ilin vahiməli iyun günlərində xalqın təkidi ilə ümummilli liderimizin ölkə rəhbərliyinə qayıdışı uçurumun bir addımlığında olan Azərbaycan Respubilkasını məhv olmaq fəlakətindən xilas etdi. Heydər Əliyevin xilaskarlıq missiyası nəticəsində dövlətimiz düynanın siyasi xəritəsindən silinmək təhlükəsindən, XX əsrin əvvəllərində mövcud olmuş Azərbaycan Xalq Cümhuriyyətinin aqibətindən qurtuldu, öz dövlətçiliyini qoruyub saxlamaq iqtidarında olduğunu bütün dünyaya nümayiş etdirdi.

Hakimiyyətə tarixi qayıdışından sonra ümummilli liderimizin uzaqgörənlik və müdrikliklə həyata keçirdiyi siyasət Azərbaycanın müstəqilliyini əbədi, dönməz və sarsılmaz etmişdir. Ölkəmizdə geniş miqyaslı islahatlar aparılmış, demokratik, hüquqi, dünyəvi dövlət qurulmuşdur. Vətəndaş cəmiyyəti və bazar iqtisadiyyatı prinsipləri bərqərar edilmiş, qanunun aliliyi, insan və vətəndaş hüquqlarının qorunması, söz, fikir azadlığı, siyasi plüralizm təmin olunmuşdur.

Yeni neft və iqtisadi inkişaf strategiyası hazırlanmış, Xəzər dənizinin Azərbaycan sektorunda enerji ehtiyatlarının işlənilməsinə dair 20-dən çox saziş imzalanmışdır. İqtisadi tənəzzüldən ardıcıl inkişafa keçid baş vermişdir. Ölkəmiz nəhəng iqtisadi layihələrin təşəbbüsçüsü və iştirakçısı olmuş, tarixi İpək Yolunun bərpası, Bakı-Tbilisi-Ceyhan əsas ixrac boru kəmərinin, Bakı-Tbilisi-Ərzurum qaz kəmərinin çəkilməsi layihələrinin hərəkətverici qüvvəsinə çevrilmişdir.

Ermənistan-Azərbaycan, Dağlıq Qarabağ münaqişəsinin beynəlxalq hüquq normaları və prinsipləri, xüsusən onların arasında başlıca prinsip olan dövlətlərin sərhədlərinin toxunulmazlığı və ərazi bütövlüyü əsasında sülh yolu ilə nizama salınmasına dair danışıqlara başlanılmışdır. Xalqımızın haqq işinin dəstəklənməsinə nail olmaq üçün dünya miqyasında lazımi tədbirlər görülmüş, ölkəmiz beynəlxalq aləmdə layiq olduğu yerini tutmuşdur. Azərbaycan Respublikası bir çox nüfuzlu beynəlxalq təşkilatların, o cümlədən BMT-nin, ATƏT-in, Avropa Şurasının, Qara Dəniz İqtisadi Əməkdaşlıq Təşkilatının, İslam Konfransı Təşkilatının, Müstəqil Dövlətlər Birliyinin, İqtisadi Əməkdaşlıq Təşkilatının bərabərhüquqlu üzvü, GUÖAM regional qurumunun təşəbbüsçüsü və fəal iştirakçısı olmuşdur.

Bu gün Azərbaycan Respublikasının dövlət müstəqilliyinin 13-cü ildönümünü qarşılayarkən xalqımız bütün ömrünü Azərbaycan dövlətinin qorunmasına, möhkəmlənməsinə və inkişafına həsr etmiş, tariximizin ən böyük simalarının ön cərgəsində dayanmaq haqqı qazanmış Heydər Əliyevin misilsiz xidmətlərini bir daha minnətdarlıq hissi ilə xatırlayır. Onun dünya siyasət xəzinəsinə daxil olmuş altmış illik möhtəşəm fəaliyyəti Azərbaycan xalqının əsrlər boyu ürəyində yaşatdığı müstəqil dövlətçilik arzusunun gerçəkliyə çevrilməsində müstəsna rol oynamışdır.

Möhtərəm cənab Prezident!

Bu günlər ölkəmizin siyasi həyatında baş verən ən əlamətdar hadisələrdən biri də Sizin Azərbaycan Respublikasının Prezidenti vəzifəsində fəaliyyətinizin bir ilinin tamam olmasıdır. Ötən il oktyabrın 15-də xalqımız prezident seçkilərində Sizə səs verməklə Azərbaycanı xoşbəxt gələcəyə aparan Heydər Əliyev siyasi xəttinin davam etdirilməsinə tərəfdar olduğunu bildirmişdir. Azərbaycanın demokratik inkişafında yeni mərhələnin başlanğıcını qoyan bu tarixi hadisə son 10 ildə keçdiyimiz inkişaf yolunun məntiqi davamı olub müasir dövrdə dövlətimiz üçün həyati əhəmiyyət daşıyan siyasi varisliyi təmin etmişdir.

Prezident seçkilərindən ötən bir il tarix üçün çox qısa müddət olsa da, Sizin rəhbərliyinizlə ölkəmizdə görülmüş işlərin miqyası və sanbalı əminliklə söyləməyə imkan verir ki, ümummilli liderimiz Heydər Əliyevin yaratdığı möhkəm və sarsılmaz təməl üzərində tərəqqi edən Azərbaycan Respublikası yaxın gələcəkdə bölgənin ən qüdrətli dövlətinə çevriləcəkdir. Dövlət başçısı vəzifəsində Sizin həyata keçirdiyiniz layihələr ölkəmizin siyasi, iqtisadi, sosial və mədəni həyatında islahatları uğurla davam etdirməyə imkan yaradır. Regionlarımızın sosial-iqtisadi inkişafına yönəldilən düşünülmüş tədbirlər görülür, ölkəmizin iştirak etdiyi nəhəng transmilli iqtisadi layihələr, o cümlədən Bakı-Tbilisi-Ceyhan əsas ixrac boru kəmərinin çəkilməsi layihəsi uğurla davam etdirilir. Sənayeyə, kənd təsərrüfatına, iqtisadiyyatın digər sahələrinə böyük diqqət yetirilir. Azərbaycan xalqının rifah halının yüksəldilməsi, yeni iş yerlərinin açılması, əmək haqlarının, müavinətlərin və pensiyaların artırılması, elmə, ədəbiyyata, incəsənətə, idmana qayğı göstərilməsi böyük rəğbətlə qarşılanır.

Sizin xarici ölkələrə etdiyiniz səfərlər, dövlət başçıları ilə, siyasi xadimlərlə apardığınız səmərəli danışıqlar Azərbaycanın dünya miqyasında mövqelərini daha da möhkəmləndirməyə kömək göstərir, haqq işimizin dəstəklənməsinə, Ermənistan-Azərbaycan, Dağlıq Qarabağ münaqişəsinin sülh yolu ilə nizama salınmasına təminat yaradır.

Möhtərəm cənab Prezident!

Ümummilli liderimiz Heydər Əliyevin siyasi xəttinin davam etdirilməsi, onun ideyalarının yaşadılması naminə gördüyünüz işlər Sizə xalqın məhəbbətini qazandırmışdır. Xalqımız Sizi sevir və Sizin ətrafınızda sıx birləşmişdir. Biz inanırıq ki, Sizə xas olan siyasi səriştə, qətiyyət və əzmkarlıq sayəsində ümummilli liderimiz Heydər Əliyevin yolunu bundan sonra da uğurla davam etdirəcək, müstəqil dövlətimizin qarşısında dayanan bütün problemlərin həllinə nail olacaqsınız.

Əziz Prezident!

Sizi Prezidentlik fəaliyyətinizin bir illiyi və Azərbaycan Respublikasının Dövlət müstəqilliyinin 13-cü ildönümü münasibətilə Milli Məclisin deputatları adından və şəxsən öz adımdan bir daha ürəkdən təbrik edir, Sizə möhkəm cansağlığı, dövlətimizin və xalqımızın xoşbəxt gələcəyi naminə dəyərli fəaliyyətinizdə yeni-yeni uğurlar arzulayıram!

Dərin ehtiram hissi ilə,

Azərbaycan Respublikasının

Milli Məclisi adından

Milli Məclisin sədri

Murtuz Ələsgərov

(Təbrik Azərbaycan Respublikası Milli Məclisinin 2004-cü il

15 oktyabr tarixli iclasında qəbul edilmişdir).