Azərbaycan şahmatçıları “Vyana Open-2015” beynəlxalq festivalında uğurla çıxış edirlər
Bakı, 21 avqust, AZƏRTAC
Şahmatçılarımız “Vyana Open-2015” beynəlxalq festivalında uğurlu çıxışlarını davam etdirirlər.
Azərbaycan Şahmat Federasiyasından AZƏRTAC-a bildiriblər ki, A, B, C və D turnirlərindən ibarət keçirilən festival çərçivəsində Şəhriyar Məmmədyarov ilə yerli şahmatçı Markus Ragger arasında 6 partiyadan ibarət matç oynanılır. Üçüncü oyunda növbəti qələbəsini qazanan Ş.Məmmədyarov hazırda 2,5-0,5 hesabı ilə öndədir.
A qrupunda mübarizə aparan təmsilçilərimiz - Eltac Səfərli və Nərgiz Umudova altıncı turda qələbə qazanıblar. E.Səfərli İtaliya şahmatçısı Giovanni Sorberanı, N.Umudova isə yerli idmançı Yuri Xalaxanı məğlub edib. Altı turdan sonra N.Umudova aktivinə 4,5, E.Səfərli isə 4 xal yazdırıb.
Uşaqların turnirində Afiq İsrafilov 4,5 xal toplayaraq 7-16-cı yerləri bölüşdürür. Tofiq İsrafilov isə 4 xalla 19-cu pillədə qərarlaşıb.
Turnir İsveçrə sistemi üzrə 9 turdan ibarət keçirilir.
Bölmənin digər xəbərləri
