Azərbaycan səfiri beynəlxalq virtual konfransda ölkəmizin iqtisadi və sərmayə yatırımı imkanlarından danışıb
Haaqa, 30 yanvar, AZƏRTAC
Haaqa Hüquq və Arbitraj Mərkəzi (HCLA) və Yaponiyanın Doşişa Universitetinin Qlobal Tədqiqatlar Ali Məktəbinin birgə təşkilatçılığı ilə “İpək Yolu boyunca biznes imkanları və çağırışları: Mərkəzi Asiya, İran və Qafqazdan Avropa İttifaqına doğru” adlı virtual konfrans keçirilib.
AZƏRTAC xəbər verir ki, Yaponiya, Çin, Niderland, Azərbaycan, Özbəkistan, İran və bir çox digər ölkələrdən 200 ekspert, sahibkar, diplomat və dövlət xadimləri natiq və dinləyici qismində panel müzakirələrinə qoşulublar.
Azərbaycanın Niderlanddakı səfiri Fikrət Axundovun “Niyə Azərbaycana sərmayə yatırılmalıdır?” mövzusunda çıxışı panel iştirakçıları tərəfindən maraqla qarşılanıb.
Azərbaycanlı səfir ölkəmizin makroiqtisadi göstəriciləri, iqtisadiyyatının strukturu, neft-qaz və qeyri-neft sektorları haqqında ətraflı məlumat verib. Ölkəmizdəki sərmayə yatırmaq mühiti və bu sahədəki qanunvericilikdən söz açaraq, iş adamlarının fəaliyyətinin asanlaşdırılması istiqamətində dövlətin atdığı addımlardan, xarici sərmayələrə hər hansı məhdudiyyətin olmamasından, ölkəmizin xarici sərmayə yatırımlarının qorunması və təşviqi sahələrində mühüm beynəlxalq çoxtərəfli sazişlərə qoşulmasından, sərmayələrin qarşılıqlı təşviqindən, eləcə də ikiqat vergitutmanın ləğv edilməsinə dair çoxsaylı sazişlərin imzalanmasından söz açıb.
Çıxışında Azərbaycan sənayesinə toxunan səfir F.Axundov Sumqayıt, Balaxanı, Qaradağ, Mingəçevir və Pirallahıda yaradılmış sənaye parklarında şirkətlərə yaradılmış güzəştli şərtlər və imkanlardan danışıb. Sərmayə yatırımı üçün cəlbedici olan kimya, metallurgiya, elektrik istehsalı, ağır maşınqayırma, tikinti, yüngül sənaye, qida emalı kimi sahələrdın söz açıb. Ölkəmizin tranzit və logistika imkanlarından, regionun ən böyük limanı -Bakı Beynəlxalq Dəniz Ticarət Limanından, onun müasir İpək Yolu, nəqliyyat dəhlizləri üzərində yerləşməsi haqqında məlumat verib.
Ələt Azad İqtisadi Zonası (AİZ), onun ölkəmizin qeyri-neft sektorunun şaxələndirilməsi istiqamətində potensialına dair məlumatlar da səfirin təqdimatında yer alıb. Qeyd edib ki, AİZ daha çox güzəştlərdən yararlanacaq və sərmayəçilər bu zonadakı münbit şəraitdən faydalanacaqlar.
Diplomat ölkəmizin kənd təsərrüfatı sahəsindəki imkanlardan da söz açaraq, torpaqlarımızın münbitliyindən, müxtəlif kənd təsərrüfatı məhsulları yetişdirilməsindən və onların ixracından danışıb. Xüsusilə də şərab, qurudulmuş meyvə, mürəbbə, qoz-fındıq kimi bir çox məhsulların Avropa və Asiya ölkələrinə ixrac edildiyini diqqətə çatdırıb. Ölkəmizin fındıq istehsalına görə dünyada ilk beşlikdə olduğunu qeyd edib.
Ali Baş Komandan İlham Əliyevin rəhbərliyi altında müzəffər Ordumuzun 44 gün ərzində Ermənistanın 30 il müddətində işğal altında saxladığı Azərbaycanın Qarabağ və onun ətrafındakı 7 rayonu azad etdiyini diqqətə çatdıran səfir bu ərazilərdəki infrastrukturun ermənilər tərəfindən tamamilə dağıdıldığını bildirib.
Vurğulayıb ki, işğaldan azad olunmuş bu ərazilər təbii sərvətlərlə zəngindir. Bu ərazilərin bərpası sahəsində də geniş sərmayə yatırmaq imkanları olduğunu deyən diplomat nümunə olaraq kənd təsərrüfatı və qida emalı, su idarəçiliyi, turizm, alternativ və bərpa edilən enerji, tikinti, metallurgiya və dağ-mədən sənayesi, informasiya-kommunikasiya texnologiyaları, xalçaçılıq və ipək istehsalı, kiçik ailə sahibkarlığı kimi sahələri göstərib.
Tədbirdə Fikrət Axundovla yanaşı, İranın sənaye, dağ-mədən və ticarət nazirinin müavini Həmid Zadboom, Doşişa Universitetinin Qlobal Tədqiqatlar Ali Məktəbinin dekanı, professor Hisae Nakanişi, Yaponiyanın Əfqanıstandakı keçmiş xüsusi nümayəndəsi, səfir Tadamiçi Yamamoto, İnvestisiya Hüququ və Arbitraj üzrə Avropa Federasiyasının Baş katibi, professor Nikos Lavranos, beynəlxalq mediator və arbitr Tomas Con, Özbəkistanın Belçikadakı səfirliyinin əməkdaşı Bobur Sabirov, Tehran Ticarət, Sənaye, Dağ-Mədən və Kənd Təsərrüfatı Palatasının nümayəndəsi Ali Kolahi təqdimatlarla çıxış ediblər.
Şəhla Ağalarova
AZƏRTAC-ın xüsusi müxbiri
Haaqa
Bölmənin digər xəbərləri
