Azərbaycan TDT-nin inkişafı, əməkdaşlığın genişlənməsi üçün fəal səylər göstərir – Rəy
Bakı, 25 noyabr, AZƏRTAC
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) qlobal əhəmiyyətli bir çox qərarlar qəbul edildi və razılıqlar əldə olundu. Dünyanın 200-ə yaxın ölkəsindən 76 mindən çox iştirakçının qeydiyyatdan keçməsi Azərbaycanın yüksək təşkilatçılığının, qlobal miqyasda oynadığı mühüm rolunun göstəricisidir. Tədbirdə iqlim dəyişmələrinin qarşısının alınması, bu sahədə təhlükələrin aradan qaldırılması yolları müzakirə olundu və gələcək planlar müəyyən edildi.
İqlim dəyişmələrinin qarşısının alınması yollarından ən əsası yaşıl enerjiyə keçid ola bilər ki, Azərbaycan bu istiqamətdə də qısa müddətdə uğurlu addımlar atıb. Ölkəmizdə külək, su və günəş enerjisi layihələri dünyanın qabaqcıl texnologiyalarına malik beynəlxalq şirkətlərlə əməkdaşlıq çərçivəsində icra edilir. Eyni zamanda, COP29 çərçivəsində Azərbaycan, Qazaxıstan və Özbəkistan dövlət başçılarının imzaladığı “Azərbaycan Respublikası, Qazaxıstan Respublikası və Özbəkistan Respublikası hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” Türk Dövlətləri Təşkilatı (TDT) nəzdində yaşıl enerjiyə keçidlə bağlı yol xəritəsi olacaq.
Bu sözləri AZƏRTAC-a açıqlamasında politoloq Yalçın Hacızadə söyləyib.
O bildirib ki, son illər TDT-yə üzv ölkələr nəqliyyat, investisiya, enerji və sənaye kimi mühüm sahələrdə fəal əməkdaşlıq edir. Həmçinin ötən müddətdə TDT-yə üzv ölkələr arasında iqtisadi-ticari əlaqələrin daha da genişləndirilməsi istiqamətində bir sıra addımlar atılıb. Bu baxımdan 2022-ci il noyabrın 11-də Səmərqənd şəhərində imzalanan “Türk Dövlətləri Təşkilatının hökumətləri arasında sadələşdirilmiş gömrük dəhlizinin yaradılması haqqında” Saziş xüsusi əhəmiyyət daşıyır. Belə ki, sözügedən sənəd TDT hökumətlərinin gömrük orqanları arasında malların və nəqliyyat vasitələrinin hərəkəti ilə bağlı məlumat mübadiləsinin asanlaşdırılmasına imkan yaradıb. Bununla da Təşkilata üzv hökumətlər arasında daşınan mallar və nəqliyyat vasitələri haqqında məlumatların elektron şəkildə mübadiləsi gerçəkləşib. Nəticədə isə sürətli yük daşımaları və yüklərin həcmi xeyli artıb.
“Türk Dövlətləri Təşkilatına üzv dövlətlərin hökumətləri arasında beynəlxalq kombinə edilmiş yük daşımaları haqqında” sazişin təsdiqlənməsi isə Orta Dəhlizin praktiki əhəmiyyətinə müsbət təsir göstərməklə yanaşı, regionda baş verən yeni geosiyasi və geoiqtisadi reallıqlar fonunda sözügedən marşrutla Çindən Avropaya quru yolla daşınan yüklərin Qazaxıstan və Azərbaycandan keçərək həcminin daha da artırılması üçün zəmin yaradır.
Azərbaycan TDT-nin inkişafında, əməkdaşlığının artmasında fəal səy göstərir. İkinci Qarabağ müharibəsində əldə etdiyimiz Qələbə bu Təşkilata üzv ölkələr arasında olan inamı, əməkdaşlığı və güvəni daha da artırdı. Ümumiyyətlə, TDT ilə əməkdaşlıq Azərbaycanın xarici siyasətinin başlıca prioritetidir. Dövlətimizin başçısı cari il fevralın 14-də yenidən ölkə Prezidenti seçilməsi münasibətilə keçirilən andiçmə mərasimindəki çıxışında bununla bağlı bildirdi: “Türk Dövlətləri Təşkilatına üzv olan bütün ölkələrlə qardaşlıq münasibətlərimiz var və bizim siyasətimiz Türk Dövlətləri Təşkilatını gücləndirməkdir. Bu, böyük coğrafiyadır, böyük ərazidir, böyük hərbi gücdür, böyük iqtisadiyyatdır, təbii sərvətlərdir, nəqliyyat yollarıdır, gənc əhalidir, artan əhalidir və bir soydan, kökdən olan xalqlardır. Bundan güclü birlik ola bilərmi? Əlbəttə ki, yox. Biz müştərək səylərlə elə etməliyik ki, Türk Dövlətləri Təşkilatı qlobal arenada önəmli aktora və güc mərkəzinə çevrilsin. Buna biz ancaq birlikdə nail ola bilərik”. Politoloq deyib ki, bu fikirlər Prezident İlham Əliyevin Türk dünyasına verdiyi xüsusi önəmin, türk dövlətləri ilə əməkdaşlığın Azərbaycanın xarici siyasətinin əsas istiqamətlərindən olmasının, həmçinin türk birliyinin və həmrəyliyinin, TDT-nin bundan sonra da inkişaf edərək möhkəmlənəcəyinə əminliyin parlaq ifadəsi idi.
Bölmənin digər xəbərləri
