Azərbaycan-Türkiyə tandemi regiondankənar qüvvələrin planlarını pozur ŞƏRH
Bakı, 12 may, AZƏRTAC
Prezident İlham Əliyevin Zəngilanda etdiyi çıxış regional təhlükəsizlik, Cənubi Qafqazda formalaşmış yeni reallıq və Ermənistan-Azərbaycan sülh prosesi baxımından mühüm siyasi mesajlarla zəngin idi. Bu çıxış, eyni zamanda, sülh prosesinə zərbə vurmağa çalışan qüvvələrə açıq xəbərdarlıq xarakteri daşıyırdı.
Bu fikirləri AZƏRTAC-a açıqlamasında Milli Məclisin deputatı Tural Gəncəliyev bildirib.
O qeyd edib ki, hazırda Avropa İttifaqında, xüsusilə bəzi siyasi dairələr və institutlar daxilində 44 günlük Vətən müharibəsindən sonra yaranmış yeni reallığı qəbul etmək istəməyən qüvvələr fəallaşıb. Xüsusilə Avropa İttifaqının parlament strukturları, Avropa Parlamenti, Avropa Şurası Parlament Assambleyası kimi institutlar və Avropa İttifaqı missiyası adı altında fəaliyyət göstərən bəzi qüvvələr Fransanın rəhbərliyi ilə Azərbaycana qarşı kampaniya aparırlar. Müharibənin başa çatmasını, regionda sülh prosesinin başlanmasını həzm edə bilməyən dairələr Ermənistanda seçkiqabağı revanşist əhvali-ruhiyyəni qızışdırmağa çalışırlar.
“Revanşizmin gündəmə gətirilməsi xüsusilə seçki dövrlərində daha fəal müşahidə olunur. Bir tərəfdən Avropa Komissiyası və Avropa İttifaqının icraedici strukturları Paşinyan hakimiyyətinə dəstək nümayiş etdirir, digər tərəfdən isə destruktiv qüvvələr regionda yeni gərginlik ocaqları yaratmağa çalışırlar. Fransanın xarici işlər naziri Jan-Noel Barronun son açıqlamaları, fransız siyasətçilərin verdiyi mesajlar, eləcə də Avropa İttifaqı missiyasının Ermənistandakı fəaliyyət müddətinin uzadılması bunun açıq göstəricisidir”, – deyə Tural Gəncəliyev bildirib.
Onun sözlərinə görə, bu qüvvələr müharibədən sonra yaranmış yeni geosiyasi reallıqla barışmaq istəmirlər. “Çünki nə qədər ki, regionda münaqişə və qarşıdurma var idi, Fransa və bəzi dairələr bundan istifadə edərək Cənubi Qafqazda təsir imkanlarını qoruyurdular. Lakin Azərbaycanın tarixi Zəfəri ilə bu planlar iflasa uğradı və onların əlləri-qolları bağlandı. İndi isə yeni imkanlar və yeni təsir mexanizmləri axtarırlar. Prezident İlham Əliyevin çıxışı Azərbaycanın bu məsələlərdə prinsipial və qətiyyətli mövqeyini bir daha nümayiş etdirdi. Prezident İlham Əliyev heç kimdən çəkinmədən, açıq şəkildə sülh prosesinə mane olmağa çalışan qüvvələri və institutları ifşa etdi. İrəvanda keçirilən Avropa Siyasi Birliyi sammitində də dövlətimizin başçısı bu qüvvələrin adlarını birbaşa çəkərək onların mahiyyətini ortaya qoydu. Bu göstərdi ki, Azərbaycan milli maraqlarından bir addım belə geri çəkilməyəcək”, – deyə deputat vurğulayıb.
O bildirib ki, Azərbaycan Türkiyə ilə strateji müttəfiqlik çərçivəsində regiondankənar qüvvələrin planlarının qarşısını almağa davam edir. Azərbaycan-Türkiyə tandemi bu gün regionun əsas siyasi və təhlükəsizlik arxitekturasını formalaşdıran gücə çevrilib. Türk Dövlətləri Təşkilatının güclənməsi, Azərbaycanın geosiyasi rolunun artması istiqamətində həyata keçirilən siyasət ardıcıl şəkildə davam etdirilir. Bu isə xüsusilə Fransanı ciddi şəkildə narahat edir. Fransanın regiondakı siyasəti artıq klassik müstəmləkəçilik deyil, neokolonializm formasında özünü göstərir. Fransa artıq keçmişdə olduğu kimi birbaşa işğal siyasəti yürütmür. Bu gün onlar öz maraqlarına xidmət edən siyasi qüvvələri dəstəkləməklə və həmin ölkələri təsir altında saxlamaqla neokolonial siyasət həyata keçirirlər. Ermənistan üzərindən Cənubi Qafqazda təsir imkanlarını artırmaq cəhdləri də məhz bu siyasətin tərkib hissəsidir.
T.Gəncəliyev əlavə edib ki, Prezident İlham Əliyevin Zəngilandakı çıxışından sonra bütün dünya Azərbaycanın bu məsələlərdə susmayacağını bir daha gördü. Azərbaycan destruktiv qüvvələrin bütün planlarını ifşa edəcək, öz milli maraqlarını hər bir platformada müdafiə edəcək və regionda dayanıqlı sülhün təmin olunması istiqamətində qətiyyətli siyasətini davam etdirəcək.
Müxbir – Səbinə Əlizadə
Bölmənin digər xəbərləri
