Azərbaycan və gürcü xalqları arasındakı dostluq digər ölkələr üçün də nümunədir
Tbilisi, 29 aprel, AZƏRTAC
Azərbaycanın 44 günlük Vətən müharibəsindəki Qələbəsindən sonra regionda yeni reallıqlar yaranıb. Azərbaycan dünyaya sübut etdi ki, dondurulmuş münaqişə yoxdur və istənilən halda hər hansı bir problemi həll etmək mümkündür.
AZƏRTAC xəbər verir ki, bu fikirlər Azərbaycanın Gürcüstandakı səfirliyində Ermənistanın işğalından azad olunmuş ərazilərimizdə bu günlərdə səfərdə olan Gürcüstanın mədəniyyət xadimləri, ekoloqlar, türkoloqlar və blogerlərindən ibarət nümayəndə heyəti ilə görüşdə səslənib.
Səfir Faiq Quliyev Azərbaycan ilə Gürcüstan arasındakı dostluq münasibətlərindən danışıb, əlaqələrimizin strateji tərəfdaşlıq səviyyəsinə yüksəldiyini xüsusi qeyd edib.
Bildirib ki, dost gürcü xalqı da bunu əməllərində sübut edib. Gürcüstanın mədəniyyət xadimləri, ekoloqlar, türkoloqlar və blogerlərindən ibarət nümayəndə heyətinin səfərləri zamanı işğaldan azad olunmuş ərazilərdəki erməni vandalizmi, vəhşilikləri, eləcə də Azərbaycan dövlətinin həmin ərazilərdə qısa zamanda həyata keçirdiyi layihələr barədə fikirləri də buna əyani sübutdur.
Səfir deyib ki, bizim dostluğumuz və birliyimiz digər ölkələr üçün də nümunədir.
Diplomat qeyd edib ki, xarici ölkə nümayəndələrinin həmin ərazilərə səfərlərinin təşkilində məqsəd erməni vandalizminin ağır nəticələri və Azərbaycan dövlətinin həyata keçirdiyi layihələrlə onları əyani şəkildə tanış etməkdir. Bu cür səfərlər bundan sonra da təşkil olunacaq və xarici ölkələrin nümayəndələri hər şeyi öz gözləri ilə görəcəklər.
Sonra gürcü hüquqşünas Nino Lordkipanidze, müğənni Veriko Turaşvili, psixoloq Ekaterina Kipiani, bloqer Tamuna Mişladze və başqaları Azərbaycanın işğaldan azad edilmiş ərazilərinə səfərin təşkilinə görə Azərbaycan dövlətinə və səfirliyə minnətdarlıq ediblər.
Bildirilib ki, ermənilərin 30 ilə yaxın işğal altında saxladıqları ərazilərdə törətdikləri əsl vandalizm və soyqırımı aktıdır. İnsanları qətlə yetirmək, təbiətə, tarixi, mədəni abidlərə belə böyük ziyan vurmaq insanlığa qarşı cinayətdir.
Gürcüstan nümayəndə heyətinin üzvləri Azərbaycan dövlətinin işğaldan azad edilmiş ərazilərdə həyata keçirdiyi tikinti-quraşdırma, abadlıq işlərini də yüksək qiymətləndiriblər.
Bildirilib ki, Azərbaycan Prezidentinin rəhbərliyi altında ordunun qazandığı bu uğurlar xalqla dövlətin sarsılmaz birliyinin, mübarizliyinin təzahürüdür. Azərbaycanın qələbəsi regionda həqiqətən də yeni reallıqlar yaradıb. Cənubi Qafqaz ölkələri əbədi sülh şəraitində yaşamalıdırlar. Yalnız sülh və sabitlik nəticəsində regionda davamlı inkişafa nail oluna bilər.
Sonda gürcü uşaqlara “Qarabağ” futbol klubunun formaları hədiyyə olunub, xatirə şəkili çəkdirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
