RƏSMİ XRONİKA
AZƏRBAYCAN VƏ LİTVA PREZİDENTLƏRİ BİRGƏ BƏYANNAMƏ İMZALAMIŞLAR
Azərbaycan Respublikasının Prezidenti İlham Əliyev və Litva Respublikasının Prezidenti Valdas Adamkus iyunun 8-də Bakıda Birgə Bəyannamə imzalamışlar.
Bəyannamədə deyilir ki, dövlət başçıları Azərbaycan Respublikası və Litva Respublikası arasında siyasi, iqtisadi və sosial əlaqələrin genişləndirilməsi məqsədi ilə, Azərbaycanın Avropa İttifaqı və NATO ilə gələcək əməkdaşlığının daha da inkişafı niyyəti ilə və Litva Respublikasının Prezidenti cənab Valdas Adamkusun Azərbaycana səfərinin iki ölkə arasında gələcək dostluq və tərəfdaşlığa təkan verəcəyinə əminliklərini bildirərək bəyan edirlər ki, Litva Respublikasının Prezidenti və Azərbaycan Respublikasının Prezidenti ikitərəfli siyasi, iqtisadi və mədəni əlaqələri gələcəkdə inkişaf etdirəcəklərini təsdiqləyirlər. Prezidentlər əlaqələrin qanunun aliliyi, demokratiya, insan hüquqları və bazar iqtisadiyyatı kimi dəyərlər əsasında inkişaf etdirilməsində qətiyyətli olduqlarını qeyd edirlər. Litva tərəfi Azərbaycanda davam edən demokratikləşmə, vətəndaş cəmiyyəti və bazar iqtisadiyyatı prinsiplərinin gücləndirilməsinə yönəldilmiş səyləri alqışlayır.
Prezidentlər iki ölkə arasında ticarət, iqtisadi, turizm, səhiyyə, elm, təhsil, mədəniyyət sahəsində əməkdaşlığın və texniki əməkdaşlığın səviyyəsinin dinamik surətdə inkişaf edən bazar iqtisadiyyatının potensialı və imkanlarına tam şəkildə uyğun gəlməsi üçün əlavə tədbirlər həyata keçirilməsini dəstəkləyirlər. Dövlət başçıları iki ölkə arasında səmərəli iqtisadi layihələrin həyata keçirilməsi, dövlət müəssisələri və özəl müəssisələr arasında əməkdaşlıq üçün əlverişli şəraitin təmin edilməsi və onların birliklərinin yaradılması, maliyyə və bank strukturları arasında əlaqələrin inkişaf etdirilməsinə kömək göstərməyə hazır olduqlarını ifadə edirlər.
Prezidentlər Azərbaycan Respublikasının Avropa İttifaqına yaxınlaşmasında Avropa Qonşuluq Siyasətinin müsbət təsirini məmnuniyyətlə vurğulayır və Fəaliyyət Planının yekunlaşmasında maraqlı olduqlarını bəyan edirlər. Tərəflər Azərbaycan Respublikasının Avropa və Avratlantik strukturlarına inteqrasiyasına yardım olunmasına istiqamətlənmiş əlaqələri inkişaf etdirəcəklər. Bu məqsədlə Litva Respublikasının Prezidenti aşağıdakı sahələrdə Litvanın dövlət təsisatlarının Azərbaycan Respublikasının Avropa və Avratlantik strukturlarına inteqrasiyası yolunda öz təcrübələrini bölüşməyə hazır olduqlarını təsdiq edir:
- inzibati strukturun gücləndirilməsi, islahat prosesində təcrübə mübadiləsi, mülki qulluqçuların Avropaya inteqrasiya məsələlərində treninqi;
- Avropaya inteqrasiya məsələlərinə dair birgə məsləhətləşmələrin, konfransların və digər fəaliyyətlərin həyata keçirilməsi;
- qanunvericiliyin Avropa İttifaqının standartlarına uyğunlaşdırılması sahəsində təcrübə mübadiləsi;
- cəmiyyətin Avropa İttifaqı haqqında məlumatlandırılması üçün kommunikasiya strategiyasının inkişafına dair təcrübə mübadiləsi və islahat üçün ictimai dəstəyin artırılması;
- Azərbaycan Respublikası ilə NATO arasında “Fərdi tərəfdaşlığın fəaliyyət planı”nın müvəffəqiyyətlə həyata keçirilməsi;
- birgə görüşlər, məsləhətləşmələr və treninqlər yolu ilə hərbi islahatlara dair təcrübə mübadiləsi;
- təhlükəsizlik sahəsində milli qanunvericiliyin qəbulu və NATO-nun prinsipləri və tələblərinin müdafiəsi;
- müvafıq qeyri-hökumət təşkilatları arasında əməkdaşlığın təşviqi.
Bəyannamədə deyilir ki, Litva tərəfi Azərbaycan Respublikasında aparılan iqtisadi islahatların vacibliyini vurğulayaraq, Azərbaycanın Dünya Ticarət Təşkilatına üzv olmaq təşəbbüsünü dəstəklədiyini bildirir.
Tərəflər BMT Nizamnaməsinin prinsiplərini və ATƏT-in Lissabon Sammitində qəbul edilmiş üç prinsipi tam dəstəkləyərək və onları rəhbər tutaraq, Ermənistan-Azərbaycan, Dağlıq Qarabağ münaqişəsinin beynəlxalq hüququn hamılıqla tanınmış prinsipləri və normaları əsasında, xüsusilə dövlətlərin suverenliyi, ərazi bütövlüyü və sərhədlərinin toxunulmazlığı prinsipləri əsasında sülh yolu ilə həll edilməsinin vacibliyini bildirirlər. Tərəflər Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində ATƏT çərçivəsində davam edən səylərə, Minsk qrupunun fəaliyyətinə istinad edərək, bu istiqamətdə daha təsirli və qətiyyətli addımlar atılmasının vacibliyini bir daha vurğulayırlar.
Sənəddə daha sonra deyilir ki, Tərəflər mütəşəkkil cinayətkarlıq, korrupsiya, qanunsuz miqrasiya, insan alveri, çirkli pulların yuyulması, narkotik vasitələrin, psixotrop maddələrin və prekursorların, zəhərli kimyəvi maddələrin, silahların, partlayıcı vasitələrin qanunsuz dövriyyəsi, habelə hava quldurluğu ilə və qaçaqmalçılıqla mübarizədə əməkdaşlığın zəruri olduğunu bir daha qeyd edirlər.
Tərəflər Avropada enerji təhlükəsizliyinin artan önəmliliyini vurğulayır və eyni zamanda, Xəzər dənizi regionunun enerji ehtiyatlarını Avropanın enerji şəbəkəsi ilə birləşdirən enerji, nəqliyyat layihələrinin inkişafını dəstəklədiklərini bəyan edirlər. Bu baxımdan Tərəflər Bakı-Tbilisi-Ceyhan əsas ixrac neft boru kəməri, Bakı-Tbilisi-Ərzurum qaz boru kəməri, habelə Bakı-Tbilisi-Axalkalaki-Qars dəmir yolu layihələrinin həyata keçirilməsinin beynəlxalq əhəmiyyətini qeyd edirlər.
Bəyannamədə daha sonra deyilir: Azərbaycan Respublikasının və Litva Respublikasının prezidentləri əmin olduqlarını bildirirlər ki, ikitərəfli və beynəlxalq əməkdaşlıq sülh və təhlükəsizliyin möhkəmləndirilməsinə xidmət edir. Bununla əlaqədar, Tərəflər Baltikyanı dövlətlər və Cənubi Qafqaz ölkələri arasında regional əməkdaşlığın intensivləşdirilməsini xüsusi vurğulayaraq, Baltik və Xəzər dənizləri regionları arasında əməkdaşlığı təşviq edəcəklər.