Azərbaycan və Özbəkistan Türk dünyasının birliyinin möhkəmlənməsində mühüm rol oynayır - ŞƏRH
Bakı, 24 avqust, AZƏRTAC
Azərbaycanın Mərkəzi Asiya ölkələri ilə əlaqələri son illərdə yeni istiqamətlərdə uğurla inkişaf edir. Azərbaycan–Özbəkistan münasibətləri isə bunun bariz nümunəsidir. Azərbaycan və Özbəkistan prezidentlərinin qarşılıqlı etimada, dostluğa və qardaşlığa əsaslanan münasibətləri iki ölkə arasındakı əlaqələrin inkişafını şərtləndirən əsas amillərdəndir. Prezident İlham Əliyev Özbəkistanın Milli İnformasiya Agentliyinə (UzA) müsahibəsində bu reallıqları xüsusi qeyd edib. O bildirib: “Özbəkistan Respublikasının Prezidenti, əziz qardaşım, hörmətli Şavkat Miromonoviç Mirziyoyev ilə mənim aramda mövcud olan səmimi dostluq, qarşılıqlı hörmət və etimad Azərbaycan–Özbəkistan qardaşlığının möhkəmlənməsində, dövlətlərarası əlaqələrin hazırkı səviyyəyə qaldırılmasında və müttəfiqliyimizin inkişafında xüsusi rol oynayır. Prezident Mirziyoyevin ölkələrimiz arasında qardaşlıq, birlik və müttəfiqlik naminə yorulmaz və qətiyyətli fəaliyyəti ona Azərbaycanda dərin hörmət və rəğbət qazandırıb”.
Dövlətimizin başçısı, həmçinin qeyd edib ki, dövlətlərimiz arasında siyasi dialoq çox yüksək səviyyədədir. Son beş ildə ən yüksək səviyyədə 15 müntəzəm qarşılıqlı səfərin və sıx təmasların həyata keçirilməsi əlaqələrin dinamik inkişafı və daha da möhkəmlənməsi üçün əlverişli şərait yaradıb.
Azərbaycan–Özbəkistan münasibətləri ortaq tarixə, mədəniyyətə, dilə və mənəvi dəyərlərə, xalqlarımız arasında əsrlər boyu formalaşmış dostluq, birlik və həmrəyliyə, nəsildən-nəslə ötürülən qarşılıqlı rəğbətə əsaslanır. Məhz bu möhkəm təməl üzərində qurulan dövlətlərarası münasibətlər son illərdə yeni məzmun qazanaraq müttəfiqlik səviyyəsinə yüksəlib.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.
Deputat qeyd edib ki, Azərbaycan–Özbəkistan münasibətlərinin inkişaf potensialını müəyyən edən əsas istiqamətlərdən biri nəqliyyat-logistika əməkdaşlığıdır. İki ölkə arasında iqtisadi-ticari əlaqələr də dinamik inkişaf edir. Azərbaycan ilə Özbəkistan arasında ortaq köklərə, dil və mədəni yaxınlığa, eləcə də əsrlər boyu formalaşmış mənəvi dəyərlərə əsaslanan mədəni-humanitar əməkdaşlıq ikitərəfli münasibətlərin mühüm istiqamətlərindən biridir. Bu sahədə həyata keçirilən birgə layihələr xalqlarımız arasında qarşılıqlı anlaşmanın, etimadın, dostluğun və qardaşlıq münasibətlərinin daha da möhkəmlənməsinə mühüm töhfə verir, humanitar əlaqələrə yeni məzmun qazandırır.
M.Həsənov xatırladıb ki, ötən il Prezident İlham Əliyev Özbəkistan Prezidenti Şavkat Mirziyoyev ilə birlikdə Bakının mərkəzində iki ölkə arasında qardaşlığın daha bir rəmzinə çevriləcək “Özbəkistan” parkının təməlini qoyub. Bu məqamı da xüsusi qeyd etmək lazımdır ki, Heydər Əliyev Fondu tərəfindən həyata keçirilən təşəbbüs və layihələr Azərbaycan ilə Özbəkistan arasında mədəni-humanitar əməkdaşlığın genişləndirilməsində mühüm əhəmiyyət daşıyır.
Deputat bildirib ki, iki ölkənin regionları arasında əlaqələr də intensivləşib, şəhərlər arasında qardaşlıq münasibətləri qurulub: “Bakı–Daşkənd, İsmayıllı–Riştan, Şuşa–Xivə, Lənkəran–Buxara, Şəki–Kokand, Biləsuvar–Termez, Mingəçevir–Namanqan, Füzuli–Güliston, Quba–Cizzax və Beyləqan–Şəhrisəbz şəhərləri arasında qardaşlaşma münasibətləri yaradılıb. Həmçinin Ürgənc–Naxçıvan, Ürgənc–Xankəndi və Buxara–Laçın şəhərləri arasında qardaşlaşma münasibətlərinin qurulması barədə qərar qəbul edilib”.
Azərbaycan və Özbəkistan yalnız ikitərəfli münasibətlər çərçivəsində deyil, çoxtərəfli platformalarda da səmərəli əməkdaşlıq edir. Türk Dövlətləri Təşkilatı çərçivəsində siyasi dialoqun, iqtisadi əlaqələrin, nəqliyyat-logistika imkanlarının, təhsil, elm və mədəni-humanitar əməkdaşlığın inkişafına verdikləri töhfə türk dövlətləri arasında əlaqələrin daha da dərinləşməsinə xidmət edir.
Həmçinin ortaq türk irsinin qorunması və təbliği istiqamətində Azərbaycan və Özbəkistanın həyata keçirdiyi təşəbbüslər bu zəngin mənəvi irsin gələcək nəsillərə ötürülməsi baxımından xüsusi əhəmiyyət daşıyır.
Bölmənin digər xəbərləri
