AZƏRBAYCAN XARİCİ İŞLƏR NAZİRİNİN İTALİYAYA SƏFƏRİ
Nazirliyin mətbuat mərkəzindən AZƏRTAC-a bildirmişlər ki, Venetoya səfərdən məqsəd regionun biznes dairələri ilə görüşlər keçirərək, Azərbaycanın iqtisadi imkanları barədə məlumat vermək və yerli şirkətlərin Azərbaycana cəlb olunması istiqamətində müzakirələr aparmaq idi.
Səfər regionun ən əhəmiyyətli iqtisadi-sənaye, turizm, səhiyyə mərkəzlərindən biri olan Abano Terme (Padova əyaləti) şəhərindən başlamışdır. Şəhər bələdiyyəsində keçirilmiş tanışlıq xarakterli görüşdə Padova əyalətinin prezidenti, əyalətdə mərkəzi hökumətin nümayəndəsi, yerli hüquq mühafizə orqanlarının rəhbərləri, Abano Terme şəhərinin meri, Padova Universitetinin rektoru və digər şəxslər iştirak etmişlər.
Sonra şəhərin biznes mərkəzində Azərbaycanın təqdimatı konfransı öz işinə başlamışdır. Padova əyalətindən olan 100-ə yaxın şirkətin təmsilçilərinin toplaşdığı tədbir Padova Ticarət Palatası və İtaliyada yenicə fəaliyyətə başlamış Azərbaycan-İtaliya Ticarət Palatası tərəfindən təşkil olunmuşdur.
Konfransda çıxış edən nazir Elmar Məmmədyarov Azərbaycanın əhəmiyyətli coğrafi-siyasi və coğrafi-iqtisadi məkanda yerləşməsi, zəngin təbii sərvətlərə malik olması, makroiqtisadi səviyyədə əldə olunan uğurlar, ölkəmizdə həyata keçirilən nəhəng enerji layihələri barədə məlumat vermişdir. Azərbaycanda iqtisadiyyatın şaxələndirilməsi məqsədi ilə qeyri-neft sektorunun inkişafının prioritet məsələ olduğunu bildirən nazir kənd təsərrüfatı, kimya, toxuculuq-trikotaj, ərzaq məhsullarının istehsalı, turizm, dəri emalı və sair sahələrdəki geniş imkanlardan danışmışdır. O, İtaliyanın kiçik və orta şirkətlərinin bu sahələrdə böyük təcrübəsi olduğunu vurğulamış, onları Azərbaycana dəvət etmişdir. Sonra nazir tədbir iştirakçılarının suallarına cavab vermişdir.
Elmar Məmmədyarov Venesiyada Veneto regionunun xarici işlər naziri xanım Marialuisa Koppola ilə görüşmüşdür. Görüşdə Azərbaycanla Veneto arasında birbaşa əlaqələrin qurulması, Venetonun iqtisadi təcrübəsinin əhəmiyyəti barədə müzakirələr aparılmışdır.
Sonra Azərbaycanın təqdimatı ilə bağlı növbəti konfrans keçirilmişdir. Tədbirdə Veneto regionu Sənaye Konfederasiyasının, Sənayeçilər Assosiasiyasının, Ticarət Palataları Birliyinin rəhbərləri iştirak etmişlər. Nazir Elmar Məmmədyarov Azərbaycanın iqtisadi imkanları ilə bağlı məruzə etmiş, tədbir iştirakçıları ilə əməkdaşlıqla bağlı fikir mübadiləsi aparmışdır.
Oktyabrın 7-də ilk görüş Vatikan dövlətinin xarici işlər naziri Cüzeppe Loyano ilə olmuşdur. Görüşdə ikitərəfli münasibətlərin hazırkı vəziyyəti, əlaqələrin inkişaf perspektivləri, Vatikan dövlətinin Bakıda diplomatik nümayəndəliyinin açılması imkanları, Ermənistan-Azərbaycan, Dağlıq Qarabağ problemi ilə bağlı müzakirələr aparılmış, eləcə də beynəlxalq məsələlər, xüsusilə də İraq və Əfqanıstandakı vəziyyət barədə fikir mübadiləsi edilmişdir.
Həmin gün Elmar Məmmədyarov İtaliyanın xarici işlər naziri Franko Frattini ilə görüşmüşdür. Tərəflər Azərbaycan ilə İtaliya arasında siyasi, iqtisadi, humanitar sahələrdə əlaqələrin yüksək səviyyədə olmasını, iqtisadi sahədə, xüsusilə qeyri-neft sektorunda əməkdaşlığın daha da inkişaf etdirilməsinin əhəmiyyətini vurğulamışdır. 2005-ci ilin birinci rübündə Azərbaycan Prezidenti İlham Əliyevin İtaliyaya rəsmi səfər proqramı çərçivəsində həyata keçiriləcək görüşlər və tədbirlər barədə də müzakirələr aparılmışdır. Görüşdə Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsipləri əsasında sülh yolu ilə nizamlanmasına, eləcə də Qafqazdakı ümumi vəziyyətə dair fikir mübadiləsi edilmişdir.
Nazirin İtaliya parlamenti Deputatlar palatasının xarici əlaqələr komissiyasının sədri Qustavo Selva ilə görüşündə parlamentlərarası əlaqələrin inkişaf etdirilməsi imkanlarından söhbət getmişdir.
Elmar Məmmədyarovun İtaliya Senatının sədri Marçello Pera ilə görüşündə ölkələrimiz arasındakı münasibətlərin hazırkı vəziyyət və parlamentlərarası əlaqələr, Ermənistan-Azərbaycan, Dağlıq Qarabağ münaqişəsi, qlobal siyasi problemlər barədə fikir mübadiləsi aparılmışdır.
Bölmənin digər xəbərləri
