AZƏRBAYCAN XIRDA ÖDƏNİŞLƏR SAHƏSİNDƏ DANİMARKANIN TƏCRÜBƏSİNİ ÖYRƏNİR
Azərbaycan Milli Bankı idarə heyəti sədrinin birinci müavini Alim Quliyevin rəhbərlik etdiyi nümayəndə heyəti Danimarkada işgüzar səfərdə olmuşdur. Nümayəndə heyətinə Milli Bankın mütəxəssisləri ilə yanaşı, digər hökumət təşkilatlarının və şirkətlərin təmsilçiləri, “Azərdəmiryolbank”ın Müşahidə Şurasının sədri Rəhman Hacıyev və Beynəlxalq Valyuta Fondunun eksperti Nils Larsen də daxil idilər. Səfərdən məqsəd xırda ödənişlər sahəsində bu ölkənin təcrübəsini öyrənmək olmuşdur.
Milli Bankın mətbuat xidmətindən bildirmişlər ki, nümayəndə heyəti Danimarka Milli Bankında, Banklar Assosiasiyasında, ölkənin ən iri bankı olan Danske Bankda, habelə Klirinq Palatasında, Kommunal ödəmələrin yığımı təşkilatında görüşlər keçirmişlər.
Xırda ödənişlər sahəsində Danimarkanın təcrübəsinin öyrənilməsi nəticəsində Azərbaycanda bu sahənin inkişaf etdirilməsi üçün bir sıra tədbirlərin həyata keçirilməsi, o cümlədən kart ödənişləri üzrə Klirinq Palatasının yaradılması, kommunal ödəmələrin yığılması, pensiya və əmək haqlarının ödənilməsi üçün poçt xidmətindən istifadə edilməsi nəzərdə tutulur. Bundan əlavə, ödəmələrin milli formatının işlənməsi və müvafiq qurumlarla razılaşdırılması, təşkilatların avtomatlaşdırılmış sistemlərinə minimal tələblərin müəyyən edilməsi, hesablaşmaların həyata keçirilməsi üçün pilot təşkilatın seçilməsi də planlaşdırılır.
Milli Bankda məsləhət xidmətləri göstərən BVF-nin eksperti Nils Larsen səfərin nəticələrinin faydalı olduğunu bildirmişdir.
Bölmənin digər xəbərləri
