Azərbaycan yaşıl gələcəyə doğru inamla addımlayır ŞƏRH
Bakı, 22 noyabr, AZƏRTAC
İki həftə ərzində Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ölkəmiz üçün yeni bir dövrün başlanğıcı kimi qiymətləndirilə bilər. Dünyada enerji keçidi və yaşıl iqtisadiyyata transformasiya proseslərinin geniş vüsət aldığı bir dövrdə bu konfransın Bakıda keçirilməsi yalnız Azərbaycanın deyil, bütün regionun gələcək inkişaf istiqamətləri üçün mühüm əhəmiyyət daşıyır. Bu tədbir yerli ictimaiyyəti qlobal iqlim problemləri və onların həlli yolları barədə məlumatlandırmaqla yanaşı, daha geniş şüur inkişafına və ətraf mühitə həssas yanaşmaya təkan verir.
Bu fikirləri AZƏRTAC-a məxsusi açıqlamasında Milli Məclisin deputatı Vüqar İskəndərov deyib.
COP29-da qlobal iqlim dəyişikliyi ilə mübarizə istiqamətində yeni qərarların qəbul olunduğunu bildirən deputat əlavə edib: “Bu qərarlar və öhdəliklər Azərbaycanın qanunvericilik bazasında mühüm dəyişikliklərə səbəb ola bilər. Dövlət orqanları və biznes sektoru bu qərarların icrası çərçivəsində öz fəaliyyətini ekoloji dəyərlərə daha uyğun hala gətirməyə məcbur olacaq. Bu, yalnız iqtisadi sahədə deyil, eyni zamanda, sosial və mədəni sferalarda da yeni yanaşmaların meydana çıxmasını təmin edəcək. Beləliklə, COP29 Azərbaycan cəmiyyətində ekoloji şüurun formalaşmasına, ətraf mühitlə və ya ekosistemlə harmoniyada yaşamağa töhfə verəcək”.
Azərbaycanın öhdəliklərindən və perspektivlərdən danışan Vüqar İskəndərov qeyd edib ki, iqlim dəyişikliyi ilə mübarizədə ölkəmizin üzərinə götürdüyü yeni öhdəliklər, həm dövlət, həm də özəl sektor üçün yeni standartlar və tələblər müəyyənləşdirəcək. Bu prosesdə əsas məqsəd dövlət orqanlarının və korporativ sektorun ətraf mühitə qarşı məsuliyyətli və diqqətli davranışını təmin etməkdir. Qlobal miqyasda qəbul edilən qərarlar ölkəmizdə ekologiya ilə bağlı qanunvericiliyin yenilənməsi və beynəlxalq öhdəliklərə uyğunlaşdırılmasını sürətləndirəcək. Hökumətin dəstəyi ilə bundan sonra müxtəlif ictimai aksiyalar və sosial məsuliyyət layihələrinin həyata keçirilməsi gözlənilir. Dövlət təşkilatları və özəl sektor tərəfindən ekoloji dəyərləri təşviq edən layihələrin və tədbirlərin sayı əhəmiyyətli dərəcədə artacaq. Bu layihələr ətraf mühitin qorunması sahəsində ictimai iştirakçılığı artıracaq və yerli əhalinin ekoloji şüurunu daha da gücləndirəcək.
COP29 çərçivəsində yaşıl iqtisadiyyata keçidin Azərbaycanın əsas prioritetlərindən biri kimi vurğulandığını diqqətə çatdıran deputat deyib: “Dövlətin birbaşa dəstəyi ilə maliyyə institutlarının yaşıl enerji ilə bağlı layihələrə əlverişli şərtlərlə maddi dəstək göstərməsi planlaşdırılır. Bu, həm sahibkarlara, həm də adi vətəndaşlara ekoloji cəhətdən faydalı layihələr həyata keçirmək üçün yeni imkanlar yaradacaq. Məsələn, bərpaolunan enerji mənbələrinin istifadəsinin genişləndirilməsi, tullantıların idarə edilməsi və ekoloji təmiz istehsalat texnologiyalarının tətbiqi təşviq ediləcək”.
Qlobal təcrübənin tətbiqindən danışan V.İskəndərov hesab edir ki, yaşıl iqtisadiyyata keçid prosesində inkişaf etmiş ölkələrin uğurlu təcrübələrinin öyrənilməsi və tətbiqi də mühüm rol oynayacaq. Bu ölkələrdə sosial, iqtisadi və maliyyə sektorlarında atılan addımlar Azərbaycanın yaşıl keçid prosesinə inteqrasiyasını asanlaşdıracaq. Davamlı inkişafın təmin edilməsi üçün texnoloji yeniliklərdən istifadə və ekoloji təhsilin gücləndirilməsi vacibdir.
Deputatın fikrincə, COP29 konfransı yalnız Azərbaycanın deyil, bütün dünyanın üzləşdiyi iqlim böhranının həlli üçün mühüm addım olacaq. Bu tədbir həm qlobal səviyyədə müzakirələrin aparılması, həm də yerli səviyyədə konkret fəaliyyət planlarının hazırlanması üçün əvəzolunmaz platformadır. Azərbaycanın bu prosesdə aktiv rolu ölkəmizi yaşıl gələcəyin qurulmasında liderlər sırasına daxil edəcək.
Bölmənin digər xəbərləri
