İQTİSADİYYAT
Azərbaycanda 30-dan çox internet provayderi fəaliyyət göstərir
Bakı, 5 avqust (AZƏRTAC). Azərbaycan internet xidmətləri bazarında ilin əvvəlindən vəziyyət, demək olar ki, dəyişməmişdir.
AZƏRTAC “Delta Telecom” şirkətinin saytına istinadla xəbər verir ki, ölkədə fəaliyyət göstərən internet provayderlərin interaktiv qrafikinə əsasən, genişzolaqlı internet xidmətləri bazarında “Bakinternet”in payı 1 faizədək artaraq 25,5 faiz təşkil etmişdir.
Bu dövrdə, ənənəvi olaraq reytinqdə birinci yerləri tutan “Aztelekom”, “Uninet” və “Azeronline” şirkətləri kəskin rəqabəti davam etdirmişlər.
Son bir ayda “Aztelekom”un bazar payı 1,2 faiz artaraq 16,7 faiz , “Uninet”in payı 11,16 faiz, “Azeronline”ın 8,3 faiz, “Connect”in 5,5 faiz, “Dataplus”un 6 faiz olmuşdur. Onların ardınca “Azqtel”in bazar payı 4,5 faiz, “Adanet”in 3 faiz, ”Ultel”in 2,5 faiz, “Azstarnet”in 2,3 faiz, “Smart”ın 1,8 faiz, “Avirtel”in 1,7 faiz, “Azeurotel” 1,6 faiz, “Castel”in 1,7 faiz, “AzStateNet”-in payı 1,32 faiz təşkil etmişdir. Digər provayderlərin bazarda payı 0,01-1,21 faiz ətrafında olmuşdur.
Ötən ilin sonundan etibarən “Orbit.az”, “Qtelecom”, “Meqatelecom”, “Globalnet”, “Eurotelecom” kimi yeni şirkətlər işə başlamış və onlar bazarın 1 faiz aşağı payına malikdirlər. Ümumilikdə, ölkədə 30-dan çox internet provayderi fəaliyyət göstərir.