Qazaxıstanda QR-111 sistemi vasitəsilə uşaqlardan 167 min müraciət daxil olub
Astana, 11 iyun, AZƏRTAC
2024-cü ilin oktyabrından bu ilin iyun ayınadək Qazaxıstanda QR-111 sistemi vasitəsilə uşaqlardan 167 min müraciət və 4523 zəng daxil olub.
AZƏRTAC Qazaxıstan Prezidentinin mətbuat xidmətinə istinadla xəbər verir ki, bu barədə Uşaq Hüquqları üzrə Müvəkkil Dinara Zakiyeva Prezident Kasım-Jomart Tokayevə məlumat verib.
Onun sözlərinə görə, məktəblərdə QR-111 sisteminin tətbiqi və yerləşdirilməsi uşaqlarla birbaşa qarşılıqlı əlaqənin qurulmasında və onların hüquqlarının pozulması faktlarının aşkarlanmasında öz effektivliyini göstərib.
O, həmçinin psixoloji dəstək mərkəzlərinin yaradılması və uşaqların psixoloji rifahının diaqnostikası üzrə vahid proqramın tətbiqi barədə dövlət başçısını məlumatlandırıb. Bu, daha çox diqqət və yardıma ehtiyacı olan uşaqlara yerli səviyyədə sistemli dəstəyin təmin edilməsinə imkan verib.
QR-111 uşaqların 111 nömrəli dövlət çağrı mərkəzi vasitəsilə operativ şəkildə yardım üçün müraciət etməsini təmin edən sistemdir. Məktəblərdə xüsusi QR kodlar yerləşdirilir və onların vasitəsilə uşaq öz hüquqlarının pozulması, təhlükəsizliyinə təhdidlər və ya psixoloji dəstəyə ehtiyac barədə məlumat verə bilir.
Bölmənin digər xəbərləri
