BDU-da Respublika Fənn Olimpiadalarının humanitar fənlər üzrə qalibləri mükafatlandırılıb
Bakı, 11 iyun, AZƏRTAC
Bakı Dövlət Universitetində (BDU) Respublika Fənn Olimpiadalarının (RFO) humanitar fənlər üzrə qaliblərinin mükafatlandırılması mərasimi keçirilib.
Universitetdən AZƏRTAC-a verilən məlumata görə, əvvəlcə Dövlət Himni səsləndirilib, daha sonra şəhidlərimizin əziz xatirəsi bir dəqiqəlik sükutla yad edilib.
Açılış nitqi ilə çıxış edən elm və təhsil nazirinin müavini İdris İsayev bildirib ki, qaliblərin uğurlarının arxasında böyük zəhmət, əzmkarlıq və məqsədyönlü fəaliyyət dayanır. Nazir müavini qeyd edib ki, olimpiada qaliblərinin əldə etdiyi nailiyyətlər yalnız medal və mükafatlarla ölçülmür, onların qazandıqları bilik, bacarıq və düşüncə tərzi gələcək uğurlarının əsasını təşkil edir.
İdris İsayev əldə olunan nəticələrdə valideynlərin və müəllimlərin rolunu xüsusi qeyd edərək onları təbrik edib, ölkədə təhsilin inkişafı və gənclərin potensialının üzə çıxarılması istiqamətində həyata keçirilən tədbirlərin əhəmiyyətini vurğulayıb. Qeyd olunub ki, Respublika Fənn Olimpiadaları şagirdlərin bilik və bacarıqlarının inkişaf etdirilməsi, onların beynəlxalq səviyyədə rəqabətqabiliyyətli kadrlar kimi yetişməsi baxımından mühüm rol oynayır: “Hər dövlətin gücü həm də onun insan kapitalı ilə ölçülür. Bu mənada Respublika Fənn Olimpiadaları ölkəmizin insan potensialının formalaşmasında əsas platformalardan biridir. Bu uşaqların arasında gələcəyin alimləri, həkimləri, iqtisadçıları, dövlət xadimləri əyləşiblər. Əminik ki, siz ölkəmizin gələcək inkişafına öz töhfələrinizi verəcəksiniz. Çünki ölkəmizin gələcəyi sizin bilik və bacarıqlarınızdan, Vətənə bağlılığınızdan asılıdır”.
BDU-nun rektoru Elçin Babayev çıxışında Azərbaycanda bütün sahələrdə olduğu kimi, təhsildə ardıcıl və məqsədyönlü inkişafın müşahidə olunduğunu bildirib. O qeyd edib ki, Prezident İlham Əliyevin və Birinci vitse-prezident Mehriban Əliyevanın təhsilə göstərdikləri diqqət və qayğının nəticəsində ölkəmizdə həm orta, həm də ali təhsil səviyyəsində mühüm uğurlar əldə edilir. Respublika Fənn Olimpiadalarının mükafatlandırılması mərasimi də həmin dövlət siyasətinin uğurlu nəticələrinin bariz nümunəsidir.
Rektor diqqətə çatdırıb ki, RFO qalibləri yalnız medal qazanmırlar, ölkənin aparıcı ali təhsil müəssisələrinin bir sıra ixtisaslarına müsabiqədənkənar qəbul olmaq hüququ əldə edirlər. Bu isə onların əzminin, zəhmətinin və biliyinin ən yüksək qiymətləndirilməsidir: “BDU-nun nəzdində fəaliyyət göstərən “Gənc istedadlar” liseyi də uzun illərdir ki, ölkəmizin elm və təhsil həyatına dəyərli töhfələr verir. Artıq iyirmi ilə yaxındır fəaliyyət göstərən liseyin şagirdləri hər il müxtəlif olimpiada və müsabiqələrdə uğurla çıxış edirlər. Bu il liseyin 11-ci sinif şagirdi Elman Kərimli kimya fənni üzrə Respublika Fənn Olimpiadasının qızıl medalçısı olmaqla yanaşı, 60-cı Mendeleyev Beynəlxalq Kimya Olimpiadasında bürünc medal qazanıb. 9-cu sinif şagirdi Fidan Həşimova kimya fənni üzrə Respublika Fənn Olimpiadasında qızıl, Yeniyetmələrin Beynəlxalq Elm Olimpiadasında bürünc medal əldə edib. 9-cu sinif şagirdi Alikamal Həsən riyaziyyat fənni üzrə Respublika Fənn Olimpiadasının gümüş medalçısı olmaqla yanaşı, Avropa Riyaziyyat Kubokunda da eyni mükafata layiq görülüb. “Gənc istedadlar” liseyinin şagirdləri 2025/2026-cı tədris ilində keçirilən Respublika Fənn Olimpiadalarında 3 qızıl, 4 gümüş və 4 bürünc olmaqla, ümumilikdə 11 medal qazanıblar".
Tədbirin rəsmi hissəsindən sonra humanitar fənlər üzrə 32 qızıl, 62 gümüş, 89 bürünc medal qaliblərə təqdim olunub.
Bölmənin digər xəbərləri
