Azərbaycanda ana və uşaqların sağlamlığının qorunması istiqamətində ciddi addımlar atılır YENİLƏNİB
Bakı, 21 iyun, AZƏRTAC
İyunun 21-də Ə.Əliyev adına Azərbaycan Dövlət Həkimləri Təkmilləşdirmə İnstitutunda K.Y.Fərəcova adına Elmi-Tədqiqat Pediatriya İnstitutu ilə birgə “Pediatriyanın tibbi-sosial aspektləri. Müasir yanaşmaların tətbiqi” mövzusunda elmi-praktiki konfrans keçirilib. Konfransda respublikanın şəhər və regionlarında çalışan neonatoloq və pediatrlarla yanaşı, xarici ölkələrdən gəlmiş mütəxəssislər də iştirak ediblər.
AZƏRTAC xəbər verir ki, Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru, professor Nazim Qasımov Prezident İlham Əliyevin 2014-cü il iyunun 13-də imzaladığı “Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramının təsdiq edilməsi barədə” Sərəncamın indiyə qədər səhiyyə sisteminin inkişafı ilə bağlı həyata keçirilən tədbirlərin davam etdirilməsinə, əhalinin sağlamlığının daha yüksək səviyyədə qorunmasına xidmət edəcək növbəti addım olduğunu bildirib. Bildirilib ki, proqramda da qeyd olunduğu kimi bu sahədə mühüm nailiyyətlər əldə olunsa da, hələ ana və uşaqların qorunmasında problemlər qalmaqdadır. Dövlət Proqramında mövcud nöqsan və çatışmazlıqların aradan qaldırılması yolları müəyyənləşdirilib, onun məqsəd və vəzifələrinin qadın və uşaqlara göstərilən müalicə-profilaktika yardımlarının keyfiyyətinin yüksəldilməsindən, onların sağlamlıq vəziyyətinin yaxşılaşdırılmasından ibarət olduğu qeyd olunub.
Rektor bildirib ki, ölkəmizdə səhiyyənin inkişafı və tibbi yardımların imkanlarının gücləndirilməsi ilə yanaşı, əhalinin tibbi maarifləndirilməsini daha da genişləndirmək vacib hədəflərdəndir. Qohum evliliklərinin ölkəmizdə hələ də qeydə alınması, öz növbəsində, qüsurlu körpələrin dünyaya gəlməsinə, ana və uşaq sağlamlığında risk faktoruna çevrilməkdədir. Bir sıra xəstəliklərə məhz bu kimi halların mövcudluğu səbəbi ilə tez-tez rast gəlinir. İrsi qan xəstəlikləri ilə mübarizə də hazırda Azərbaycan səhiyyəsi üçün vacib prioritetlərdən biridir. Hər il onlarla uşaq bu xəstəliyin daşıyıcısı kimi dünyaya gəlir. Ona görə də hamiləliyin təqibi bu gün sağlam nəslin formalaşmasında mühüm əhəmiyyət kəsb edir.
“Ana və uşaqların sağlamlığının qorunması istiqamətində dövlət səviyyəsində ciddi addımlar atılmaqdadır. Ümummilli lider Heydər Əliyevin səhiyyənin inkişafına diqqət və qayğısının davamı olaraq Prezident İlham Əliyevin və birinci xanım Mehriban Əliyevanın təbabətin inkişafına töhfələri, xüsusi diqqəti fundamental xarakter daşıyır. Ölkədə ana və uşaq sağlamlığına yüksək qayğı məqsədilə irimiqyaslı layihələr həyata keçirilir. “Talassemiyasız həyat naminə” layihəsi, Milli Onkologiya Mərkəzində uşaq klinikasının yaradılması, perinatal mərkəzlərin əsaslı təmiri, uşaq poliklinikalarının yenidən qurulması, təmiri və yenilərinin tikilməsi, regionlarda müalicə-diaqnostika mərkəzlərinin tikilməsi, ən son texnologiyalarla təchiz olunmuş xəstəxanaların açılması kimi çoxsaylı tədbirlər milli genofondumuzun inkişafında böyük bir dönüşə səbəb olmaqdadır”, - deyə rektor diqqətə çatdırıb.
Rektor qeyd edib ki, bu gün keçirilən konfrans həkimlərimizin təkmilləşməsi, müasir biliklərə yiyələnməsi, beynəlxalq təcrübədən yararlanması üçün təşkil edilib. O, iştirakçıların əldə etdikləri bilikləri qısa müddətdə praktikada tətbiq edəcəklərinə inandığını bildirib.
K.Y.Fərəcova adına Elmi-Tədqiqat Pediatriya İnstitutunun direktoru, Səhiyyə Nazirliyinin baş pediatrı, professor Nəsib Quliyev çıxış edərək ana və uşaqların sağlamlığının daim diqqət mərkəzində olduğunu qeyd edib. Professor, həmçinin Azərbaycanda bu istiqamətdə görülən işlərdən danışıb, atılan addımların öz bəhrəsini verdiyini diqqətə çatdırıb. Baş pediatr bildirib ki, uşaq yaşlarında sağlamlıq pozuntularının erkən aşkarlanması və onların gələcəkdə əmələ gəlməsinə qarşı profilaktik tədbirlərin həyata keçirilməsində neonatoloq və pediatrların göstərdiyi yardımlarda yeni yanaşmaların tətbiqi zəruridir. Bu baxımdan Azərbaycanda uşaqlara yardım göstərən, onların sağlamlığının keşiyində duran həkimlərin bilik və bacarıqları daim təkmilləşməlidir.
N.Quliyev konfransın həkimlər üçün faydalı olacağına əminliyini ifadə edib və uğurlar arzulayıb.
Konfrans müxtəlif mövzularda məruzə və müzakirələrlə davam etdirilib. Pediatriya və neonatologiya sahəsində antenatal diaqnostikanın perspektivləri, yenidoğulmuşlarda mərkəzi sinir sistemi xəstəliklərinin erkən aşkarlanması, erkən doğulan uşaqların qidalanması və inkişafı, Azərbaycanda uşaqlar arasında geniş yayılan inkişaf çətinlikləri və onların erkən aşkarlanmasında yeni yanaşmaların tətbiqi kimi tədqiqatların nəticələri barədə məlumatlar konfrans iştirakçılarına təqdim edilib. Eyni zamanda, konfransda ölkəmizdə onurğa xəstəliklərinin yayılması və bu halların vaxtında aşkarlanmasında pediatrların rolu haqqında, pediatriyanın sosial aspektləri, uşaq zorakılığına dair məsələlər barəsində də məlumat verilib.
Bölmənin digər xəbərləri
