Azərbaycanda görülən çoxşaxəli işlər böhran zamanı idarəetmənin ideal nümunəsidir
Bakı, 9 may, AZƏRTAC
Dünyanın pandemiya təhlükəsi ilə üz-üzə qaldığı bir zamanda ölkəmizdə müşahidə edilən müsbət tendensiya, heç şübhəsiz, müdrik idarəçiliyin göstəricisidir. Faktiki olaraq, dünya insanı ölümcül təhlükə ilə qarşılaşıb, insan həyatının qorunması ən önəmli məsələyə çevrilib. Hər bir sahədə sosial izolyasiya tədbirləri görülüb. Bununla insan həyatı təhlükədən hifz edilsə də, bu izolyasiya dünya iqtisadiyyatını böhran vəziyyətinə salıb. Belə bir zamanda Azərbaycanda istər pandemiya ilə mübarizə, insanlarımızın həyatının qorunması, istər iqtisadiyyatımızın davamlılığının təmin edilməsi, istərsə də dövlət təhlükəsizliyinə yönəlmiş cinayətkarlığın qarşısının alınması işləri yüksək peşəkarlıqla icra edilir. Bu, Prezident İlham Əliyevin uzaqgörən və müdrik siyasətinin nəticəsidir. Fikrimcə, Azərbaycanda bu günlər görülən çoxşaxəli işlər böhran zamanı idarəetmənin ideal nümunəsidir.
AZƏRTAC xəbər verir ki, bu fikirlər Azərbaycan Dillər Universiteti rektorunun müşaviri, ADU üzrə YAP ilk ərazi təşkilatının sədri Sərraf Hüseynovun “Lider qətiyyəti” məqaləsində yer alıb.
Məqalədə qeyd olunur ki, ölkə rəhbərinin mərkəzi və yerli icra hakimiyyəti orqanlarında apardığı struktur islahatlarının, onların qarşısında qoyduğu yeni tələblərin məqsədi dövlət müstəqilliyini daha da möhkəmləndirmək, vətəndaş məmnunluğunu artırmaqdır. Öz Prezidentinə güvənən və onun siyasətini dəstəkləyən Azərbaycan vətəndaşları əmindirlər ki, dövlətimizin başçısının qanunverici, icraedici və məhkəmə hakimiyyəti, habelə maliyyə sistemində apardığı islahatlar dövlət idarəetməsinin səmərəliliyini artıraraq, ilk növbədə, vətəndaşların maraqlarına xidmət edəcək, ölkənin davamlı inkişafına zəmin yaradacaq. Bu islahatlar mövcud pandemiya şəraitində də bir an dayanmayıb.
Hazırda bütün dövlət orqanları Azərbaycanın COVID-19 adlı bu qlobal bəladan maksimum az zərərlə çıxması üçün əməli tədbirlər görürlər. Bu məsələ Azərbaycan Respublikasının Birinci vitse-prezidenti Mehriban Əliyevanın xüsusi diqqət mərkəzindədir.
Lakin ürəkağrısı ilə demək lazımdır ki, belə bir durumda imkansız ailələr üçün ayrılan yardımlara göz dikən məmurlar da var. Onlar bu əməlləri ilə dövlətin dayaqlarına zərbə vuran ən qatı cinayətkarlar və xalqımıza xəyanət edən insanlardır. Onların da cəzası, şübhəsiz, ağır olacaq. Çünki buna Prezident İlham Əliyevin qətiyyəti və geridönməz siyasəti əsas verir. Hələ illər öncə “Mən hər bir azərbaycanlının Prezidenti olacağam!” deyərək başlatdığı müqəddəs missiyanı xalqa arxalanaraq davam etdirmək İlham Əliyevin müqəddəs amalına çevrilib.
“Mən Azərbaycan gəncliyinə inanıram” deyən Prezident İlham Əliyev həm gəncliyi xalqın rifahına zərbə vuran məmurlara qarşı amansız olmağa səsləyir, həm də bu haqq işində onlardan güc alır. Çünki son dövrlərdə müxtəlif istiqamətlərdə gənc kadrlara göstərilən etimad müsbət nəticələrini verməkdədir.
Prezidentin həyata keçirdiyi antikorrupsiya tədbirləri hazırda ölkəmizdə belə bir qənaəti tam olaraq formalaşdırıb: indi Azərbaycanda məmur olmaq imtiyaz deyil, məsuliyyətdir. Xalq, dövlət, ədalət mühakiməsi qarşısında məsuliyyət. Lakin Prezidentin dəfələrlə bildirməsinə baxmayaraq, bunu hələ də dərk etməyən məmurlar qalmaqdadır. Onların qanunazidd əməlləri ilə Dövlət Təhlükəsizlik Xidməti məşğul olur. Bu, artıq dövlətin korrupsiyaçı məmurlara qarşı apardığı siyasətdə qətiyyətin göstəricisidir. Çünki dövlətin, xalqın malını mənimsəyən şəxs məhz dövlətin sütunlarına, hakimiyyətin mənbəyinə zərbə vurur. Onun cəzası da dövlət əleyhinə cinayət kimi təsbit edilir və göründüyü kimi cəzalandırma bu istiqamətdən aparılır.
Bölmənin digər xəbərləri
