Azərbaycanda idmanın inkişafı istiqamətində görülən işlər davamlı xarakter daşıyır ŞƏRH
Bakı, 27 dekabr, AZƏRTAC
Azərbaycan hazırda idmanın inkişaf səviyyəsinə görə dünyada aparıcı ölkələrdən biri kimi tanınır. 1997-ci ildə İlham Əliyevin Milli Olimpiya Komitəsinin prezidenti seçilməsindən sonra ölkəmizdə Olimpiya hərəkatı, bədən tərbiyəsi və idmanın inkişafı yeni mərhələyə qədəm qoydu. Azərbaycanın beynəlxalq Olimpiya hərəkatına fəal qoşulması sayəsində ölkəmiz böyük idman potensialına malik olduğunu nümayiş etdirdi. İdman sahəsində qazanılan nailiyyətlər, həm də dövlətin ümumi inkişaf səviyyəsini, iqtisadi potensialını müəyyənləşdirən vacib meyarlardan biri hesab olunur.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
O bildirib ki, dövlətimizin iqtisadi qüdrətinin ildən-ilə artması idmanın tərəqqisinə də müsbət təsir göstərib. Hazırda nəinki paytaxtımızda, eləcə də regionlarda bir çox olimpiya kompleksləri, müasir idman obyektləri istifadəyə verilib, maddi-texniki baza möhkəmləndirilib. Bütün bunlar idmançılarımızın yerli və beynəlxalq turnirlərdə uğur qazanmalarında müstəsna rol oynayır.
“Prezident İlham Əliyev 2024-cü ilin idman yekunlarına həsr edilən mərasimdə çıxışı zamanı bu ilin Azərbaycan idmanı üçün uğurlu il olduğunu vurğulayıb. Bütövlükdə ölkə miqyasında görülmüş işlərə yüksək qiymət vermək olar. Çünki qarşıya qoyulmuş bütün vəzifələr icra edilib, Azərbaycanın dinamik inkişafı təmin olunub. İdmançılarımızın qələbələri və ölkəmizdə keçirilmiş müxtəlif beynəlxalq yarışlar Azərbaycanı bir daha idman ölkəsi kimi təsdiqləyir. İdmançılarımız bu il beynəlxalq yarışlarda 1700-ə yaxın medal qazanıblar ki, bu da çox yüksək göstəricidir. Bu uğurların əsasında Prezident İlham Əliyevin idmana xüsusi diqqət və qayğısı dayanır”, - deyə Fatma Yıldırım bildirib.
Deputat qeyd edib ki, sağlam cəmiyyət qurmaq hər bir dövlətin strateji məqsədidir. Əlbəttə ki, dövlətimiz vətəndaşların idmanla məşğul olmaları üçün xüsusi siyasət həyata keçirir. Bu mənada hər bir azərbaycanlının idmana maraq göstərməsi və müntəzəm olaraq idmanla məşğul olması dövlətin diqqət mərkəzindədir. Təbii ki, dövlət tərəfindən idmanın kütləviliyi təmin edilərək ölkədə sağlam nəsil formalaşdırılır. Bu formalaşdırılmış nəsil də Vətənimizin sağlam gələcəyi deməkdir. Vətən müharibəsində məhz sağlam, vətənpərvər gənclik torpaqlarımızı düşmən tapdağından azad etdi. Yeri gəlmişkən, işğaldan azad edilmiş ərazilərimizdə də idman infrastrukturunun yaradılması diqqət mərkəzindədir. Qarabağda və Şərqi Zəngəzurda həyata keçirilən bərpa-quruculuq işləri çərçivəsində Şuşada beynəlxalq şahmat, Suqovuşanda beynəlxalq avarçəkmə yarışlarının və Zəngilanın Ağalı kəndinin ətrafında triatlon üzrə yarışın keçirilməsi həm də ondan xəbər verir ki, tarixi torpaqlarımızda mötəbər idman yarışlarının təşkili ənənəsinin əsası artıq indidən qoyulur. Bundan əlavə, Füzuli şəhərində Olimpiya Kompleksinin inşası, Ağdamın məşhur “İmarət” stadionunun nəzərdə tutulan yeni layihəsi, Eyvazxanbəyli kəndində Qarabağ Atçılıq Kompleksinin yaradılması bu sahədə görüləcək möhtəşəm işlərdən xəbər verir.
“Ümumiyyətlə, ölkəmizdə idmanın inkişafı istiqamətində görülən işlər davamlı xarakter daşıyır. Bu amil qarşıdakı dövrdə də mühüm nailiyyətlər qazanılacağını deməyə tam əsas verir”, - deyə Fatma Yıldırım vurğulayıb.
Bölmənin digər xəbərləri
