Azərbaycanda ilk dəfə süni yolla kürü yetişdirilmişdir
Bakı, 15 aprel (AZƏRTAC). Ekologiya və Təbii Sərvətlər Nazirliyinin (ETSN)Xıllı Nərə Balıqartırma zavodunda Azərbaycanda ilk dəfə olaraq süni yolla kürü yetişdirilmişdir.
AZƏRTAC ETSN-in mətbuat xidmətinə istinadən xəbər verir ki, zavod şəraitində yetişdirilmiş törədici döllük səviyyəsinə çatdırılmış 7-8 yaşlı iki dişi nərə balığından süni yolla beş kiloqram - 260 min ədədə yaxın kürü alınmışdır. Süni yolla alınmış kürülər eyni üsulla yetişdirilmiş iki erkək nərə balığının mayası ilə mayalandırılaraq inkubasiya aparatlarına yerləşdirilmiş və bundan 200 mindən çox sürfə alınacağı gözlənilir.
Cərrahiyyə üsulu ilə aparılmış əməliyyat uğurlu keçirilmiş, balıqlar sağ qalmış və gələcəkdə onlardan yenidən kürü almaq məqsədilə nohurlara buraxılmışdır.
Hazırda zavodda dörd minə yaxın 1-9 yaş arası süni yolla alınmış törədici döllük nərə balıqları bəslənilir.
Qeyd edək ki, təbiətdə nərə balıqlarının sayının xeyli aşağı düşməsi ilə əlaqədar süni balıqartırma zavodlarında döllük balıqların tədarük edilməsində çətinliklər mövcuddur. Belə ki, süni yolla nərə kürüsünün alınmasına başlanılması mühüm əhəmiyyət kəsb edir və alınmış nəticələr ölkədə əmtəə balıqçılığının inkişafına xüsusi təkan verəcəkdir.
Bölmənin digər xəbərləri
