AZƏRBAYCANIN CÜDO ÜZRƏ YIĞMA KOMANDASI FRANSADA BEYNƏLXALQ TURNİRDƏ İŞTİRAK EDƏCƏK
AZƏRTAC xəbər verir ki, Azərbaycanın kişi və qadınlardan ibarət cüdo üzrə yığma komandası fevralın 10-11-də Parisdə keçiriləcək “A” kateqoriyalı beynəlxalq superturnirdə iştirak edəcəkdir.
Yarışda Azərbaycanı ən güclü kişi cüdoçularımız Nicat Şıxəlizadə (60 kq), Ramil Qasımov, Elçin İsmayılov (hər ikisi 66 kq), Elnur Məmmədli (73 kq), Mehman Əzizov, Elxan Rəcəbli (hər ikisi 81 kq), Elxan Məmmədov (90 kq) və Mövlud Mirəliyev (100 kq) təmsil edəcəklər. Onlar Norveçdə keçirilən təlim-məşq toplanışlarından sonra birbaşa Fransaya yola düşəcəklər.
Qadın cüdoçularımız Kifayət Qasımova, Ramilə Yusubova (hər ikisi 57 kq), Şəhanə Alməmmədova və Sona Əhmədli (hər ikisi (63 kq) isə Parisə fevralın 8-də Bakıdan uçacaqlar.
Azərbaycan cüdoçuları turnirdən sonra təşkil olunacaq təlim-məşq toplanışlarında iştirak etmək üçün Fransada daha bir neçə gün qalacaqlar.
Bölmənin digər xəbərləri
