AZƏRBAYCANIN GƏNCLƏRDƏN İBARƏT YIĞMA FUTBOL KOMANDASI POLŞA MİLLİSİNİ MƏĞLUB ETMİŞDİR
Bakı, 12 oktyabr (AZƏRTAC). Azərbaycanın futbol üzrə yığma komandası 19 yaşadək futbolçular (U-19) arasında Avropa çempionatının seçmə qrup mərhələsində ikinci qələbəsini qazanmışdır.
AFFA-dan bildirmişlər ki, Polşa millisi ilə qarşılaşan futbolçularımız 2:1 hesabı ilə qalib gəlmişlər.
Hesabı oyunun 40-cı dəqiqəsində Araz Abdullayev açmışdır. İkinci hissənin 53-cü dəqiqəsində polşalı Mixal Kuxarçik bərabərlik qolunu vurmuşdur. Oyunun 82-ci dəqiqəsində Mirhüseyn Seyidov isə Azərbaycan yığmasının qələbə topunu vurmuşdur.
Bu oyundan sonra yığmamız qrupda vahid liderdir.
Xatırladaq ki, U-19 ilk oyunda İsrail yığmasına 3:0 hesabı ilə qalib gəlmişdi.
Azərbaycan millisi növbəti oyununu oktyabrın 14-də Danimarka komandasına qarşı keçirəcəkdir.
Qeyd edək ki, bu qrupun oyunları İsraildə keçirilir.
Bölmənin digər xəbərləri
