AZƏRBAYCANIN İQTİSADİ QÜDRƏTİNİN MÖHKƏMLƏNDİRİLMƏSİ NAMİNƏ ÖLKƏDƏ İNNOVASİYA FƏALİYYƏTİ İNKİŞAF ETMƏLİDİR
AZƏRTAC xəbər verir ki, bu fikir iyulun 15-də Milli Elmlər Akademiyası (AMEA) Rəyasət Heyətinin binasında Azərbaycan Milli Elm Fondunun (AMEF) “Elm, texnologiya və sahibkarlıq” proqramı çərçivəsində “Azərbaycanda innovasiya sahibkarlığının dəstəklənməsi” mövzusunda keçirdiyi elmi-praktiki konfransda səslənmişdir.
Tədbir AMEA-nın İqtisadi İnkişaf, Rabitə və İnformasiya Texnologiyaları nazirliklərinin, ABŞ Mülki Araşdırmalar və İnkişaf Fondunun dəstəyi ilə təşkil edilmişdi.
Foyedə konfransda iştirak edən şirkətlərin stendləri və məhsulları, alimlərin ixtiraları nümayiş etdirilirdi.
AMEA-nın prezidenti Mahmud Kərimov bildirmişdir ki, konfransın məqsədi respublikamızın sosial-iqtisadi inkişafı üçün ölkə alimlərinin potensialından, elmin nailiyyətlərindən istifadə etməklə elmlə iqtisadiyyatın vəhdətini təmin etmək, elmi ideyaların, işləmələrin istehsalatda tətbiqinin təşkili yollarını müəyyənləşdirməkdir. İqtisadiyyatın innovasiya yolu ilə inkişafı bütün ölkələrdə sabitliyin və sosial-iqtisadi inkişafın təmin olunmasında mühüm rol oynayır. İqtisadiyyatın innovasiya yolu ilə inkişafı hazırda inkişaf etmiş ölkələrin əsas prioritetlərindəndir. Son illər Azərbaycanda yeni müəssisələrin yaradılmasına, bu sahəyə böyük investisiyaların qoyulmasına və ictimai diqqətin yüksəlməsinə baxmayaraq, ölkədə innovasiya sahəsində işlərin real vəziyyəti qənaətbəxş deyildir. Bunu nəzərə alaraq Prezident İlham Əliyev cari ilin aprelində Azərbaycan elmində islahatların aparılması ilə bağlı xüsusi sərəncam imzalamış, bu məqsədlə Dövlət Komissiyası yaratmışdır. Komissiyaya respublikamızda 2009-2015-ci illərdə elmin inkişafı üzrə Milli Strategiyanın və həmin strategiyanın həyata keçirilməsi üzrə Dövlət proqramının hazırlanması tapşırılmışdır.
İqtisadi İnkişaf Nazirliyi Aparatının rəhbəri Samir Vəliyev ümummilli lider Heydər Əliyev tərəfindən müəyyən edilmiş sosial-iqtisadi inkişaf üzrə strateji xəttin Prezident İlham Əliyevin rəhbərliyi ilə ardıcıl davam etdirildiyini, həyata keçirilmiş kompleks tədbirlər nəticəsində bu gün sahibkarlığın iqtisadiyyatımızın aparıcı qüvvəsinə çevrildiyini diqqətə çatdırmışdır. O, özəl sektorun ümumi daxili məhsulda payının əhəmiyyətli dərəcədə artaraq 84 faizə çatdığını, ölkədə yaradılmış əlverişli biznes mühitinin sahibkarlıq subyektlərinin sayının artmasında öz əksini tapdığını qeyd etmişdir. Məlumat verilmişdir ki, hazırda sahibkarlıq fəaliyyəti ilə məşğul olan hüquqi şəxslərin sayı 79 mini, fiziki şəxslərin sayı isə 260 mini ötmüşdür.
Ölkəmizdə sahibkarlığın inkişafı sahəsində qazanılmış müsbət nəticələrlə yanaşı, bu sahədə istifadə olunmamış ehtiyatların da olduğunu söyləyən S.Vəliyev bildirmişdir ki, xüsusilə özəl sektor tərəfindən istehsal sahələrində həyata keçirilən innovasiya fəaliyyətləri və yeni texnologiya əsasında istehsalın təşkili üzrə görülən işlər bu sahədə mövcud potensialı əks etdirmir.
Natiq sahibkarlığın inkişafı sahəsində davamlı inkişafın təmin edilməsi məqsədi ilə nazirlik tərəfindən “Azərbaycan Respublikasında sahibkarlığın inkişafı Dövlət Proqramı (2008-2013-cü illər)” layihəsinin hazırlandığını və ölkə rəhbərliyinə təqdim edildiyini də vurğulamışdır.
Gələcək inkişafın məhz innovasiyalarla bağlı olduğunu söyləyən rabitə və informasiya texnologiyaları nazirinin müavini Elmir Vəlizadə sahibkarlığın və innovasiyanın birgə irəliləməsini müsbət təcrübə kimi qiymətləndirmişdir. Bu təcrübə artıq beynəlxalq aləmdə sınaqdan keçmişdir və onun Azərbaycanda da yayılması vacibdir.
İnformasiya kommunikasiya texnologiyaları sahəsində ümumi gəlirlərin təxminən 80 faizinin özəl sektor tərəfindən əldə olunduğunu diqqətə çatdıran E.Vəlizadə sahibkarlığın Azərbaycanda sürətlə inkişaf etdiyini, özəl şirkətlərin sayının artdığını vurğulamışdır. İnnovatik fəaliyyətin ölkədə hələ geniş vüsət almadığını söyləyən natiq belə tədbirlərin keçirilməsinin, maarifləndirmənin aparılmasının, beynəlxalq təcrübənin öyrənilməsinin vacibliyindən danışmışdır.
AMEF-in direktoru Fuad İsmayılov proqramın icrası barədə ətraflı məlumat vermiş, alim və iş adamları üçün keçiriləcək tədbirlər haqqında danışmışdır.
Konfransda alimlərin innovasiya yönümlü layihələri üzrə məruzələri dinlənilmiş, şirkətlərin rəhbərləri çıxış etmişlər.
Sonda alimlərlə iş adamlarının ikitərəfli görüşləri keçirilmişdir.
######
Bölmənin digər xəbərləri
