Azərbaycanın kişilərdən ibarət yığması şahmat üzrə Avropa çempionu olmuşdur
Bakı, 18 noyabr (AZƏRTAC). Azərbaycanın kişilərdən ibarət yığması Varşavada keçirilən şahmat üzrə Avropa komanda çempionatının qalibi olmuşdur.
AZƏRTAC xəbər verir ki, son turda Azərbaycan-Ermənistan görüşü heç-heçə başa çatmışdır. Bu turda dörd partiyanın - Şəhriyar Məmmədyarov-Levon Aroyan, Teymur Rəcəbov-Sergey Movsesyan, Rauf Məmmədov-Vladimir Akopyan, Qədir Hüseynov-Qabriyel Sarkisyan görüşlərinin hər birində heç-heçə qeydə alınmışdır.
Paralel keçirilən matçda Rusiya şahmatçıları yarışların sonuncu günündən əvvəl liderlik edən Fransa şahmatçılarına 2,5-1,5 hesabı ilə qalib gəlmişlər. Qələbə ilə nəticələnən yeganə partiyada Dmitri Andreykin Vladislav Tkaçovu məğlubiyyətə uğratmışdır.
Şəhriyar Məmmədyarovun başçılıq etdiyi Azərbaycan yığması turniri 14 xalla başa vurmuşdur. Fransa, Ermənistan və Rusiya komandaları hərəyə 13 xal toplamışlar. Komandaların yekun yerləri əlavə göstəricilərə görə daha sonra müəyyən ediləcəkdir.
Azərbaycan yığması 2009-cu ildə Avropa komanda çempionatında qalib gəlmişdi. 2011-ci ildə isə yalnız Almaniya yığmasından geri qalaraq ikinci yeri tutmuşdu.
Ukrayna komandası 15,2 xalla qadınlardan ibarət komandalar arasında Avropa çempionu olmuşdur. Rusiya və Polşa komandaları hərəyə 14 komanda xalı toplamışlar.
Bölmənin digər xəbərləri
