SİYASƏT
Azərbaycanın Müstəqillik Günü münasibətilə Dehlidə rəsmi qəbul təşkil edilib
Bakı, 25 may, AZƏRTAC
Azərbaycanın Hindistandakı səfirliyi 28 May – Müstəqillik Günü münasibətilə paytaxt Dehli şəhərində rəsmi qəbul təşkil edib.
Səfirlikdən AZƏRTAC-a bildiriblər ki, tədbirin rəsmi hissəsi Hindistan və Azərbaycanın Dövlət himnlərinin səsləndirilməsi ilə başlayıb, çıxışlarla davam edib.
Ölkəmizin Hindistandakı səfiri Elçin Hüseynli 106 il əvvəl – 1918-ci il mayın 28-də Azərbaycan Xalq Cümhuriyyətinin elan edilməsi ilə müsəlman dünyasında ilk dəfə dünyəvi demokratik respublikanın qurulduğunu, iki ildən az vaxt ərzində fəaliyyət göstərməsinə baxmayaraq, qadınlara seçki hüququnun verilməsi başda olmaqla, hüquqi dövlət quruculuğu sahəsində öz zəmanəsi üçün digər çoxsaylı mütərəqqi qərarlar qəbul etdiyini diqqətə çatdırıb. Səfir builki Müstəqillik Gününün ölkəmizin müasir tarixində ilk dəfə olaraq Azərbaycanın tam konstitusion nəzarətində olan ərazisinin hər bir qarışında qeyd edildiyini, torpaqlarımızda separatçılıq, hərbi işğal, boz zona və xarici hərbi qüvvələrə yer olmadığını bildirib. O, dövlətimizin regionda və dünyada sülhpərvər, əməkdaşlıq və inkişafa yönəlik siyasət apardığını, beynəlxalq birliyin fəal və məsuliyyətli üzvünə çevrildiyini vurğulayıb.
Sonra E.Hüseynli Azərbaycan və Hindistan əlaqələrinin tarixi və hazırkı dinamikasına toxunub, iqtisadi-ticarət, o cümlədən enerji və turizm sahəsində əhəmiyyətli nailiyyətlərin olduğunu qeyd edib.
Səfir Azərbaycanın bu il COP29-a ev sahibliyi edəcəyini xatırladaraq, bunun qlobal tədbirin təşkilinin beynəlxalq birliyin yekdil qərarı ilə ölkəmizə etibar edildiyini, yaşıl, ədalətli, inklüziv və dayanıqlı dünya naminə Azərbaycanın əhəmiyyətli töhfəsi olacağını diqqətə çatdırıb. O, iqlim dəyişikliyi ilə mübarizə və yaşıl enerjiyə keçid üzrə qlobal həmrəyliyi və birliyi təmin etmək, irəliləyişlərə nail olmaq üçün COP29 sədrliyinin bütün tərəflərlə, o cümlədən Hindistanla nəticəyönümlü dialoq apardığını bildirib.
Tədbirdə çıxış edən Hindistan xarici işlər nazirinin müavini Pavan Kapur Hindistanla Azərbaycan arasında qədim vaxtlardan əlaqələrin mövcud olduğunu söyləyərək Azərbaycanı Asiya və Avropa arasında yerləşən vacib ölkə kimi səciyyələndirib. İqtisadi əlaqələr haqqında danışan nazir müavini ölkələr arasında ticarət dövriyyəsi həcminin 2023-cü ildə yüksək olduğunu, Hindistanın Azərbaycanın ilk onluqda qərarlaşan əsas ticarət tərəfdaşlarından biri olduğunu, SOCAR və Hindistanın Neft və Təbii Qaz Korporasiyasının tabeliyində olan “Videsh Ltd.” şirkəti arasında səmərəli əməkdaşlığın həyata keçirildiyini bildirib. Ölkələrimiz arasında birbaşa uçuşların sayının artması ilə Azərbaycanı ziyarət edən hindistanlı turistlərin də əhəmiyyətli dərəcədə artdığını diqqətə çatdırıb. O, Müstəqillik Günü münasibətilə Azərbaycanın Hindistandakı səfirliyini bir daha təbrik edərək ikitərəfli əlaqələrin daha da inkişafı üçün çalışacağını bildirməklə çıxışını yekunlaşdırıb.
Tədbirin keçirildiyi məkanda səfirlik tərəfindən Ümummilli Lider Heydər Əliyevin həyat və fəaliyyətinə, Şuşa şəhəri və onun təbiəti, habelə COP29 və “Yaşıl dünya naminə həmrəylik ili”nə həsr edilmiş fotoşəkillərdən ibarət stendlər qurulub.
Tədbirin mədəni hissəsində Azərbaycan musiqilərinin sədaları altında ölkəmizin mədəniyyəti, tarixi, multikulturalizm ənənələri, turizm məkanları və milli mətbəximizi əks etdirən videoçarxlar nümayiş olunub, qonaqlar üçün ziyafət verilib.