AZƏRBAYCANIN MÜSTƏQİLLİYİNİN 13-CÜ İLDÖNÜMÜ MÜNASİBƏTİLƏ ÖLKƏMİZİN ÖZBƏKİSTANDAKI SƏFİRLİYİNDƏ MƏTBUAT KONFRANSI KEÇİRİLMİŞDİR
AZƏRTAC-ın xüsusi müxbiri xəbər verir ki, Azərbaycanın Özbəkistandakı səfiri Aydın Əzimbəyov müstəqillik qazandıqdan sonra dövlətimizin əldə etdiyi uğurlardan danışmış, “Əsrin müqaviləsi”, Bakı-Tbilisi-Ceyhan əsas ixrac neft kəməri, Bakı-Novorossiysk, Bakı-Supsa neft kəmərləri haqqında məlumat vermişdir. O demişdir: “Bakı-Tbilisi-Ceyhan neft kəməri 2005-ci ilin mayında işə düşməlidir. Bu yaxınlarda isə “Əsrin müqaviləsi”nin 10 illiyi təntənəli şəkildə qeyd edilmişdir”.
Azərbaycan Prezidenti İlham Əliyevin bu ilin martında Özbəkistana səfərindən danışan diplomat bildirmişdir ki, bu səfər ölkələrimiz arasında hərtərəfli əməkdaşlığın inkişafına təkan vermişdir. Belə ki, Azərbaycan Özbəkistandan İL-76, İL-76 TD markalı yük təyyarələri almağa başlamış, bir neçə İL -114-100 sərnişin təyyarələrinin alınması istiqamətində iş aparılır.
Səfir qeyd etmişdir ki, Daşkənddə dahi Azərbaycan şairi Nizami Gəncəviyə ucaldılan abidə dostluğumuzun simvoluna çevrilmişdir və Bakıda böyük özbək şairi Əlişir Nəvainin abidəsinin qoyulmasına hazırlıq görülür.
Sonra A.Əzimbəyov jurnalistlərin suallarına cavab vermişdir.
Bölmənin digər xəbərləri
