AZƏRBAYCANIN QADIN GİMNASTLARI HOLLANDİYADA ÜÇ QIZIL MEDAL QAZANMIŞLAR
Bakı, 21 dekabr (AZƏRTAC). Azərbaycanın qadın gimnastları Hollandiyanın Utrext şəhərində keçirilən beynəlxalq turnirdə 3 qızıl medal qazanmışlar.
Azərbaycan Gimnastika Federasiyasının mətbuat xidmətindən bildirmişlər ki, Aliyə Paşayeva, İradə Əhədzadə, Mənsurə Mehdiyeva və Mədinə Həsənovadan ibarət gənclər kvarteti qızıl medala sahib olmuşdur. Xatırladaq ki, bu, gələn il Almaniyanın Bremen şəhərində keçiriləcək Avropa çempionatında iştirak etməyə hazırlaşan dörd gimnastdan ibarət yeni qrupdur.
Qitə birinciliyi Azərbaycanın yaşlılardan ibarət qrup kollektivi üçün də mühüm startlardan biri olacaqdır.
Vəfa Hüseynova və Valeriya Yeqay karyeralarını başa vuraraq, qrupu tərk etdikdən sonra Azərbaycan yığmasının baş məşqçisi Mariana Vasilyeva hər yarış ərəfəsində yeni qrup təşkil edir, qadın gimnastların peşə yararlığını yoxlayır. Bu da öz nəticəsini verir - Ceyla Quliyeva, Anastasiya Prasolova, Stefani Trayanova, Cəmilə Hüseynova, Nigar Əbdüsəlimova və Aelita Xələfova da Hollandiyada birinci yeri tutmuşlar.
Digər qadın gimnastımız Lalə Yusifova da qızıl medala sahib olmuşdur. Jalə Qaratova isə 1995-1996-cı il təvəllüdlü gənc gimnastların turnirində gümüş medal qazanmışdır.
Bölmənin digər xəbərləri
