AZƏRBAYCANIN QADIN GÜLƏŞÇİSİ DÜNYA ÇEMPİONATINDA 3-CÜ YERİ TUTMUŞDUR
İstanbulda keçirilən gənclər arasında dünya çempionatında mübarizəni qadın güləşçilər davam etdirirlər.
Azərbaycan Güləş Federasiyasından AZƏRTAC-a bildirmişlər ki, güləşçimiz Nadya Qradyuk (51 kq) dünya çempionatında 3-cü yeri tutmuşdur.
N.Qradyuk bürünc medal uğrunda təsəlliverici görüşlərə qatılmaq şansı qazanmışdır. Yığmamızın belaruslu legioneri ardıcıl olaraq Qazaxıstan və Türkiyə təmsilçilərini məğlub edərək yarımfinala çıxmışdır. Bu mərhələdə Rusiya idmançısına məğlub olan həmyerlimiz qızıl medal qazanmaq şansını itirmişdir. N.Qradyuk təsəlliverici görüşdə Yunanıstan təmsilçisini məğlub edərək, bürünc medala yiyələnmişdir.
Digər güləşçimiz Sona Əhmədli (59 kq) isə 18 idmançı arasında 8-ci yerlə kifayətlənmişdir.
Bu gün daha bir qadın güləşçimiz - Əminə Abbasova (48 kq) döşək üzərinə çıxacaqdır.
Bölmənin digər xəbərləri
