Azərbaycanın quruculuq fəaliyyətinin və regional əməkdaşlıq siyasətinin dünyada analoqu yoxdur – ŞƏRH
Bakı, 15 may, AZƏRTAC
Prezident İlham Əliyevin Qarabağ və Şərqi Zəngəzura son səfəri zamanı həm reallaşdırılmış layihələrlə bağlı ortaya çıxan mənzərə, həm də səsləndirilən mesajlar Azərbaycanın geniş mənada Qarabağ strategiyasını, dövlət rəhbərliyinin regiona və qlobal münasibətlər sisteminə baxışını aydın şəkildə ortaya qoyur.
Bu fikirləri AZƏRTAC-a açıqlamasında Qafqaz Beynəlxalq Münasibətlər və Strateji Araşdırmalar Mərkəzinin sədri Araz Aslanlı səsləndirib.
O qeyd edib ki, hələ Azərbaycan əraziləri işğal altında olduğu dövrdə dövlət rəhbərliyi tərəfindən strateji baxış formalaşdırılmışdı. Həmin yanaşmanın əsas istiqamətlərindən biri münaqişənin mümkün qədər sülh yolu ilə həllinə nail olmaq, eyni zamanda, Ermənistan tərəfindən işğal olunmuş ərazilərdə törədilmiş dağıntıları, tarixi, dini və mədəni abidələrə vurulmuş zərərləri faktlaşdıraraq beynəlxalq ictimaiyyətə çatdırmaq idi.
Ermənistanı sülh yolu ilə işğala son qoymağa məcbur etmək mümkün olmadıqda isə Azərbaycan öz ərazi bütövlüyünü və suverenliyini təmin etdi.
“44 günlük Vətən müharibəsi nəticəsində ərazilərimizin işğaldan azad olunması və daha sonra həyata keçirilən bir günlük antiterror tədbirləri Azərbaycanın milli təhlükəsizlik strategiyasını, ərazi bütövlüyünün təmin olunmasına yanaşmasını, eyni zamanda, regional əməkdaşlıq baxışını açıq şəkildə ortaya qoydu”, – deyə A.Aslanlı bildirib.
Onun sözlərinə görə, müharibədənsonrakı dövrdə Azərbaycanın yanaşması regionun gələcəyini sülh və əməkdaşlıq məkanı kimi görməsinə əsaslanır.
“Azərbaycan öz ərazilərini işğaldan azad etdikdən dərhal sonra quruculuq prosesinə başladı. Nə Azərbaycanın öz torpaqlarını işğaldan azad etməsinin, nə də müharibədən sonra həyata keçirilən genişmiqyaslı quruculuq və regional əməkdaşlıq siyasətinin dünyada analoqu yoxdur. Bu qədər nəticəyönümlü və xoş niyyətli yanaşma çox nadir hallarda müşahidə edilir”, – deyə ekspert bildirib.
A.Aslanlı qeyd edib ki, hazırda Qarabağ və Şərqi Zəngəzurda yeni yaşayış məntəqələrinin salınması, infrastruktur layihələrinin həyata keçirilməsi, məktəblərin, xəstəxanaların, yolların tikintisi və insanların doğma yurdlarına qayıdışı istiqamətində ardıcıl addımlar atılır.
“Bu proses çox böyük maliyyə resursu və ciddi diqqət tələb edir. Dövlət başçısı yalnız layihələrin təqdim olunması ilə kifayətlənmir, onların həyata keçirilmə prosesini birbaşa yerində izləyir, yekun nəticələrlə şəxsən tanış olur. Bu da prosesə ən yüksək səviyyədə diqqətin olduğunu göstərir”, – deyə o vurğulayıb.
Ekspert bildirib ki, quruculuq və sülh prosesi davam etdiyi halda, işğal dövründə törədilmiş dağıntılar və onların nəticələri heç vaxt diqqətdən kənarda qalmamalıdır.
“Azərbaycan dövləti işğal dövründə də, işğaldan sonrakı mərhələdə də bu faktların toplanmasını davam etdirir. Ermənistanın Azərbaycana vurduğu zərərlərlə bağlı mütləq hüquqi və siyasi addımlar atılmalıdır. Bu məsələ həm Ermənistanla ikitərəfli münasibətlər çərçivəsində, həm də işğal prosesində onu dəstəkləyən dövlətlər və şirkətlər kontekstində aktualdır”, – deyə Araz Aslanlı əlavə edib.
"Bəzi xarici şirkətlər də Azərbaycan əraziləri işğal altında olduğu dövrdə qanunsuz fəaliyyət göstərərək dağıntı prosesində iştirak ediblər. Həmin faktlarla bağlı materiallar toplanmalı və zəruri addımlar atılmalıdır. Yəni həm işğal və onun nəticələri unudulmamalı, düzgün qiymətləndirilməli, həm də paralel olaraq Azərbaycanın quruculuq və inkişaf xətti ardıcıl şəkildə davam etdirilməlidir”, - deyə o bildirib.
Müxbir - Nailə Həsənova
Bölmənin digər xəbərləri
