AZƏRBAYCANIN SƏHİYYƏ NAZİRİ DST İCRAİYYƏ KOMİTƏSİNİN YIĞINCAĞINDA İŞTİRAK ETMİŞDİR

08.11.2006 [20:39]
Çap et
A⁺ A^-

Azərbaycan Respublikasının BMT-nin Cenevrədəki ofisi və digər beynəlxalq təşkilatlar yanındakı daimi nümayəndəliyindən AZƏRTAC-ın xüsusi müxbirinə bildirmişlər ki, noyabrın 8-də burada Dünya Səhiyyə Təşkilatı İcraiyyə komitəsinin DST-nin baş direktorunun seçilməsi ilə əlaqədar yığıncağı keçirilmişdir. Azərbaycanın səhiyyə naziri Oqtay Şirəliyev yığıncaqda iştirak etmişdir.

Xatırladaq ki, İcraiyyə komitəsində 34 ölkə, o cümlədən Azərbaycan təmsil olunur.

DST-nin baş direktoru vəzifəsinə əsas namizəd kimi təşkilat rəhbərinin müavini, Çinin nümayəndəsi Marqaret Çan göstərilmişdi. Son turdakı səsvermə zamanı o, digər namizəd, Meksikanın səhiyyə naziri Xulio Frenkadan daha çox (24 lehinə, 10 əleyhinə) səs toplamışdır. Beləliklə, İcraiyyə komitəsi Çin nümayəndəsini DST-nin baş direktoru vəzifəsinə yeganə namizəd kimi təsdiqləmişdir.

Noyabrın 9-da DST-nin rəhbər orqanı – Ümumdünya Səhiyyə Assambleyası Marqaret Çanın namizədliyini təsdiq etməlidir.