İDMAN
Azərbaycanın üç karateçisi Dünya Oyunlarında iştirak edəcək
Bakı, 12 mart, AZƏRTAC
Karateçilərimiz ABŞ-ın Birmingem şəhərində keçiriləcək Dünya Oyunlarında iştirak edəcəklər.
Azərbaycan Milli Karate Federasiyasının mətbuat xidmətindən AZƏRTAC-a bildiriblər ki, Dünya Karate Federasiyası (WKF) İrina Zaretska (68 kq), Asiman Qurbanlı (+84 kg) və Roman Heydərlinin (kata) Dünya Oyunlarına qatılacağını təsdiqləyib.
Nüfuzlu multi-idman oyunlarında kişi və qadınlar arasında bütün çəki dərəcələrində və kata yarışlarının hər birində 8 idmançı olmaqla 96 karateçi mübarizə aparacaq. Oyunların karate yarışları iyulun 8-9-da təşkil ediləcək.
Turnirin iştirakçıları arasında dünya və Avropa çempionatlarının, eləcə də Olimpiya Oyunlarının qalib və mükafatçıları da var. Millimizin üzvləri yüksək əyarlı medallara namizədlərdən hesab edilir.