AZƏRBAYCANLI DEPUTAT DAHA BİR SƏNƏD HAZIRLAMIŞDIR
- Hələ 2001-ci ilin yanvarında ölkəmiz Avropa Şurasına üzv qəbul edilərkən nümayəndə heyətimizin rəhbəri cənab İlham Əliyev gələcək fəaliyyət istiqamətlərini müəyyənləşdirmişdi. Cənab İlham Əliyev tövsiyə etmişdi ki, AŞ-nin tribunasından və bu təşkilatın imkanlarından istifadə edərək, fəaliyyətimizi üç xətt üzrə aparmalıyıq. Birincisi, Azərbaycan həqiqətlərini Avropa Şurasına daha ətraflı çatdırmaq, ikincisi, Ermənistanın Azərbaycana qarşı apardığı təcavüzkar siyasəti və onun ağır nəticələrini ifşa etmək, üçüncüsü, Avropa dəyərlərinə sadiqliyimizi sübut edən, AŞ-ni, bütövlükdə Avropanı zənginləşdirməyə xidmət edən töhfələrimizi vermək.
Təqdim edilən yeni sənəd cənab İlham Əliyevin müəyyənləşdirdiyi
fəaliyyət istiqamətlərinin sonuncusu ilə bağlıdır.
Avropa muzeyinin yaradılması ideyası ilə mən bir il öncə AŞPA-da çıxış etmişdim. Bu fikir çox müsbət qarşılanmış, mədəniyyət, elm və təhsil komitəsi onu inkişaf etdirməyi, konkret bir sənədə çevirməyi arzulamışdı. İndiki sessiyada həmin niyyəti gerçəkləşdirdik.
Sənəddə deyilir:
“XX əsrin bütün ikinci yarısı və yeni minilliyin ilk illəri dünyanın ictimai-siyasi həyatında Avropa Şurasının nə qədər mühüm rol oynadığını əyani şəkildə sübut etmişdir. Demokratik Avropa quruculuğunda bu təşkilatın gördüyü işlər müasir tarixin ibrətli səhifələridir və Avropa Şurasının şərəfli bioqrafiyasının yalnız məqalələrdən, kitablardan deyil, bilavasitə müşahidə edilərək öyrənilməsinə də ehtiyac var. Avropanın rəmzi paytaxtına çevrilmiş Strasburqda Avropa Şurası muzeyinin yaradılması həm bu şəhərin, həm Avropa Şurasının, həm də bütövlükdə Avropanın həyatında əlamətdar hadisə ola bilər. Həmin muzeydə Avropa Şurasının keçdiyi yarım əsrdən artıq yolu əks etdirən ekspozisiyalardan əlavə, hər bir üzv dövlətin də ayrıca salonu ola bilər. Avropa Şurasına üzv olan ölkələrin hər birinin özünəməxsus zəngin mədəniyyəti vardır. Hər ölkəyə özünə aid salonu, mədəniyyətinin ən parlaq cəhətlərini əks etdirən eksponatlar və sənədlərlə tərtib etməyi həvalə etmək olar. Ayrıca götürülmüş hər bir Avropa Şurası ölkəsi öz mədəniyyət tarixini əks etdirən salonu yaratdıqda, həm mübahisələrə yer qalmaz, həm də hər bir salon peşəkar səviyyədə, elmi və tarixi cəhətdən doğru hazırlanar.
Eyni zamanda, 46 ölkənin mədəniyyətini və Avropa Şurasının tarixi inkişaf yolunu nümayiş etdirən bu möhtəşəm muzey Avropa Şurası və 46 ölkə tərəfindən birlikdə, konkret vəzifə bölgüsü aparılaraq yaradıldığından, həm maddi baxımdan ciddi problem doğurmaz, həm də sürətlə qurular. Muzeyi seyr edən hər kəs bir və ya neçə saat ərzində bütün Avropanın mədəni inkişaf tarixini izləmiş olar. Bu mədəniyyət tarixi muzeyi həm də böyük siyasi dəyər daşıyar, ayrı-ayrı dillərdə danışan, ayrı-ayrı tarixlərə, fərqli mentalitetlərə malik xalqların və dövlətlərin, əslində, bir-birinə nə qədər yaxın, doğma olduğunu əyani şəkildə tamaşaçılara göstərər. Çünki məlum həqiqətdir ki, insanları mədəniyyət qədər yaxınlaşdıran, qovuşduran ikinci vasitə təsəvvür etmək çətindir. Avropa Şurasının üzvü olan hər bir dövlət öz salonuna aid bələdçini də tərtib və nəşr edərsə, bunları asanlıqla birləşdirərək, Avropa Şurası muzeyinin ümumi kataloqunu da qısa zamanda nəşr etmək olar. Bütün məziyyətlərindən əlavə, bu muzeyin bir üstünlüyü də ondan ibarət olar ki, o, dünyanın 46 ölkəsinin birləşərək yaratdığı ilk və yeganə ümumdünya mədəniyyət müəssisəsi kimi tarixə düşər, qarşılıqlı anlaşmanın, dostluğun, sülhün və əməkdaşlığın təkrarsız nümunəsinə çevrilər.
Bütün bunları nəzərə alaraq, Assambleya Avropa Şurası muzeyi ideyasının gerçəkləşməsi üçün mədəniyyət, elm və təhsil komitəsində müzakirələr aparılmasına, problemi detalları ilə əhatə edən məruzə hazırlanması üçün məruzəçi təyin edilməsinə çağırır.
Nazirlər Komitəsinə tövsiyə edilir ki, üzv dövlətlərin mədəniyyət nazirlərinin iştirakı ilə problemin müzakirəsi təmin edilsin və həlli üçün real imkanlar araşdırılsın”.
Bölmənin digər xəbərləri
