AZƏRBAYCANLI GƏNCLƏR YUNESKO-NUN GƏNCLƏR FORUMUNDA İŞTİRAK ETMİŞLƏR
Bakı, 15 oktyabr (AZƏRTAC). Azərbaycanlı gənclər YUNESKO-nun Parisdə keçirilmiş 6-cı Gənclər Forumunda iştirak etmişlər.
Dünyanı bürümüş maliyyə böhranından çıxış yollarının müzakirə edildiyi tədbirdə 106 ölkənin nümayəndələri və 83 təşkilatdan müşahidəçilər iştirak etmişdir.
Gənclər və İdman Nazirliyindən verilən məlumata görə, Azərbaycan gəncləri Forum iştirakçılarına Azərbaycan haqqında, Qarabağ problemi barədə məlumat vermişlər.
Gənclərimiz “Green economy” (Yaşıl iqtisadiyyat) adlı müzakirədə alternativ yanacaq və alternativ istilik metodlarının daha dərindən araşdırılması və tətbiqinin səmərəliliyi haqqında danışmış, bunun ekologiyanın yaxşılaşdırılmasına təsir edəcəyini və bu istiqamətdə alimlərin və elm işçilərinin üzərinə böyük vəzifə düşdüyünü vurğulamışlar.
Eyni zamanda, Azərbaycanda keçiriləcək 6-cı Beynəlxalq Elm Olimpiadasının elmə və dövlətlər arasında dostluq əlaqələrinin möhkəmləndirilməsinə olan təsirindən də söhbət açmışlar.
Ümumilikdə forum dünya gəncləri arasında əlaqələrin yaradılmasına və əməkdaşlığın genişləndirilməsinə, o cümlədən böhrandan çıxış yollarının tədqiqinə böyük töhvə vermişdir.
Bölmənin digər xəbərləri
