Azərbaycanlı MMA döyüşçüsü: Növbəti hədəfim Rizin kəmərini qazanmaqdır
Bakı, 4 noyabr, AZƏRTAC
Yarış çox yaxşı keçdi. Çox qürurverici haldır ki, Azərbaycanda belə bir turnir təşkil olundu.
AZƏRTAC xəbər verir ki, bu sözləri Azərbaycanın MMA döyüşçüsü Mehman Məmmədov Bakıda keçirilən “Landmark 7” turnirində rəqibi Fərid Göktəpəyə qalib gəldikdən sonra keçirilən mətbuat konfransında deyib.
O, yarışın vaxtından tez qurtaracağını düşündüyünü bildirərək qeyd edib: “Açığı, istədiyim döyüş üslubunu göstərə bilmədim. Ayaqüstə döyüşməyə daha çox üstünlük verirəm. Amma türkiyəli rəqibim buna imkan vermədi”.
İdmançı Vətəndə döyüşməyin daha çox məsuliyyət tələb etdiyini vurğulayıb. “Bu vaxtadək həmişə ölkə xaricində yarışırdım. Bu dəfə öz doğma yurdumda döyüşmək məni həyəcanlandırdı. Növbəti hədəfim Rizin kəmərini qazanmaqdır. Buna görə də karyeramın axırına kimi Rizində döyüşəcəyəm”, - deyə o bildirib.
Bölmənin digər xəbərləri
