“AZƏRDƏMİRYOLBANK” ŞƏKİDƏ İŞ ADAMLARI İLƏ GÖRÜŞ KEÇİRMİŞDİR

18.06.2006 [11:59]
Çap et
A⁺ A^-

AZƏRTAC xəbər verir ki, “Azərdəmiryolbank” Səhmdar Bankının nümayəndələri “Azərbaycan Respublikası regionlarının sosial-iqtisadi inkişafı Dövlət Proqramı” çərçivəsində sahibkarların güzəştli kreditlərdən daha səmərəli istifadəsinin təmin edilməsi, kiçik və orta biznes layihələrinin maliyyələşdirilməsi məqsədi ilə Şəki şəhərində yerli iş adamları ilə görüşmüşlər.

Şəhər Telekommunikasiya Qovşağının akt zalında keçirilən görüşdə “Almaniya-Azərbaycan Fondu”nun nümayəndəsi bildirmişdir ki, hazırda fondun hesabında 3 milyon ABŞ dolları həcmində vəsait vardır. Bu vəsaitin güzəştli şərtlərlə - aylıq dərəcəsi 1,5 - 3 faiz olmaqla, bir-iki il müddətinə iş adamlarına kreditə verilməsi nəzərdə tutulmuşdur. Tədbir təşkilatçıları yerli iş adamlarına bu kreditlərdən yararlanmağı tövsiyə etmişlər.

Tədbirin sonunda 2 nəfər yerli iş adamı ilə kredit müqaviləsi imzalanmışdır.