İQTİSADİYYAT
“Azəriqaz”: Qış aylarına hazırlıq işləri yekunlaşmaq üzrədir
Bakı, 12 noyabr, AZƏRTAC
Bu qış abonentlər ötən illərlə müqayisədə daha rahat və təhlükəsiz şəkildə təbii qazla təmin olunacaq.
“Azəriqaz” İB-dən AZƏRTAC-a bildirilib ki, bu sözləri “Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev “Açıq qapı” aksiyasında deyib.
Onun sözlərinə görə, payız-qış mövsümünə hazırlıqla bağlı görülən işlər nəzərə alınsa, bunu tam əminliklə demək olar. Qurum rəsmisi bildirib ki, bu gün qaz xətlərində kipliyin yoxlanması ilə bağlı ciddi işlər aparılıb: “Azəriqaz”ın bütün daşıyıcı xətləri yoxlanılıb. Kipliklə bağlı problemlər yaranan boru xətlərində təmir işləri həyata keçirilib. İstismarda olan və müəyyən problemlər yaradan qaz xətlərinin təmiri və dəyişdirilməsi ilə bağlı bu il 60 min poqonometrə yaxın qaz xəttinin çəkilişini yerinə yetirmişik və kipliklə bağlı ortaya çıxan problemlər tam aradan qaldırılıb”.
Birliyin Bakı Regional Qaz İstismarı Departamentinin rəisi Rauf Əhmədov qış aylarına hazırlıqla bağlı işlərin yekunlaşmaq üzrə olduğunu qeyd edib. Onun sözlərinə görə, Bakıda qaz təchizatı ilə bağlı hər hansı problem yoxdur.
“Havalar soyumağa başlayandan abonentlərdən daxil olan şikayətlərin sayında artım müşahidə olunub. Qazın təzyiqi ilə bağlı 1 həftə ərzində 1744 şikayət daxil olub ki, onların həlli üçün müvafiq işlər görülüb və problemlər aradan qaldırılıb. Artıq şikayətlərin sayında ciddi azalma var. Gündəlik 100-150 arası müraciət daxil olur”, - deyə Birlik rəsmisi vurğulayıb.