BADAMDARDA YENİ POÇT MƏNTƏQƏSİ İSTİFADƏYƏ VERİLMİŞDİR
AZƏRTAC xəbər verir ki, Səbail rayonunun Badamdar qəsəbəsində yeni poçt məntəqəsi istifadəyə verilmişdir.
Mərasimdə “Azərpoçt” dövlət müəssisəsinin və Səbail Rayon İcra Hakimiyyətinin məsul şəxsləri ölkəmizdə poçt və rabitə xidmətinin müasir tələblər səviyyəsində qurulması üçün görülən işlər barədə danışmış, Prezident İlham Əliyevin diqqət və qayğısı sayəsində respublikada informasiya texnologiyalarının və milli poçtun sürətli inkişafına nail olunduğunu bildirmişlər.
Qeyd olunmuşdur ki, təkcə bu ilin ötən dövründə ölkəmizdə 130-dan çox poçt məntəqəsi tikilmişdir. Badamdar qəsəbəsində istifadəyə verilən poçt məntəqəsi isə Rabitə və İnformasiya Texnologiyaları Nazirliyi tərəfindən Səbail rayonunda tikintisi planlaşdırılan 5 məntəqədən biridir.
Poçt məntəqəsi ilə tanışlıq zamanı məlumat verilmişdir ki, binada quraşdırılan müasir avadanlıq bir çox xidmətlərlə yanaşı, əhaliyə kommunal xərclərinin ödənilməsi, məktub və teleqramların, habelə baratların göndərilməsi, ölkədaxili və MDB məkanında pul köçürmələri əməliyyatlarının sürətlə aparılmasına imkan verəcəkdir.
Bölmənin digər xəbərləri
