Bakı Dövlət Universitetində AZƏRTAC-ın xüsusi auditoriyası açılıb YENİLƏNİB VİDEO
Bakı, 22 yanvar, AZƏRTAC
Yanvarın 22-də Bakı Dövlət Universitetində (BDU) Azərbaycan Dövlət İnformasiya Agentliyinin (AZƏRTAC) media və təhsil sahələri arasında əməkdaşlığın inkişafına töhfə verəcək xüsusi auditoriyasının açılışı olub.
Tədbirdə universitetin və AZƏRTAC-ın, həmçinin bir sıra media qurumlarının rəhbərləri, ictimaiyyət nümayəndələri, ziyalılar, müəllimlər iştirak ediblər.
BDU-nun rektoru Elçin Babayev qeyd edib ki, AZƏRTAC kimi nüfuzlu media qurumunun tələbələrin praktik biliklərinin artırılması sahəsində gördüyü işlər daim inkişafın və keyfiyyətin göstəricisi olub. “Agentliyin xüsusi auditoriyasının da gələcəkdə bilik və peşəkarlığın formalaşdığı mühüm bir məkana çevriləcəyinə ürəkdən inanırıq. Biz materiallar hazırlayarkən daim AZƏRTAC-ın xəbərlərinə istinad edirik. Xəbərlərin dəqiqliyi, operativliyi və fotomaterialların yüksək keyfiyyəti AZƏRTAC-ı etibarlı informasiya mənbəyi kimi fərqləndirir. Bu gözəl auditoriya üçün təşəkkürümü bildirir, onun fəaliyyətinə uğurlar arzulayıram”, - deyə rektor bildirib.
Rektor çıxışını davam etdirərək auditoriyanın fəaliyyətinin yalnız tədris prosesini zənginləşdirməklə qalmayacağını, həm də tələbələrin praktik bacarıqlarını inkişaf etdirməyə, media sahəsində innovativ layihələr həyata keçirməyə şərait yaradacağını vurğulayıb.
AZƏRTAC-ın İdarə Heyətinin sədri Vüqar Əliyev bildirib ki, Bakı Dövlət Universiteti ölkəmizin ən qocaman ali məktəbi, jurnalistlər də daxil olmaqla bir çox sahə üzrə cəmiyyətə faydalı mütəxəssislər yetişdirən qabaqcıl təhsil ocağıdır. Xalqımızın Ümummilli Lideri Heydər Əliyevin də məzunu olduğu bu müqəddəs təhsil ocağı, bu gün də cəmiyyətimiz üçün ziyalılar yetişdirməkdə davam edir, minlərlə gəncə müasir standartlara uyğun biliklər aşılayır. Universitetin Jurnalistika fakültəsi isə ölkəmizdə peşəkar jurnalist kadrlarının hazırlanmasında mühüm rol oynayır.
“Mən tariximizin iki rəqəmini xüsusi vurğulamaq istəyirəm – 1919-cu və 1920-ci illər. Bu tarixin birincisi Bakı Dövlət Universitetinin, ikincisi isə Azərbaycan Dövlət İnformasiya Agentliyinin yarandığı illərdir. Bu il artıq universitetimiz 107, Agentliyimiz isə 106 yaşını qeyd edəcək.
Məmnuniyyətlə bildirməliyəm ki, AZƏRTAC-la Bakı Dövlət Universiteti arasında sıx əməkdaşlıq əlaqələri mövcuddur. Xüsusilə Jurnalistika fakültəsinin tələbələrinin AZƏRTAC-da təşkil olunan təcrübə proqramları onlara müasir media standartlarını dərindən mənimsəməyə şərait yaradır. Təcrübə proqramını uğurla başa vuran bəzi tələbələr Agentlikdə işlə təmin olunurlar”, - deyə İdarə Heyətinin sədri vurğulayıb.
O qeyd edib ki, Jurnalistika fakültəsində Agentliyin xüsusi auditoriyasının açılması bu fakültənin tələbələri üçün AZƏRTAC-ı daha əlçatan edəcək.
BDU-nun Milli mətbuat tarixi kafedrasının müdiri professor Cahangir Məmmədli qeyd edib ki, Bakı Dövlət Universiteti və AZƏRTAC milli maraqlara söykənən, ictimai məsuliyyət daşıyan və xalqla sıx bağlı qurumlardır. Bu iki nüfuzlu qurum arasındakı əməkdaşlıq olduqca uğurlu və nümunəvidir. Xüsusilə BDU-nun Jurnalistika fakültəsinin tələbələrinin AZƏRTAC-da istehsalat təcrübəsi keçməsi, daha sonra peşəkar jurnalist kimi burada fəaliyyətə başlaması bu əməkdaşlığın real və müsbət nəticəsidir. Bu proses gənc kadrların formalaşmasına, onların media sahəsində praktik bilik və bacarıqlar qazanmasına mühüm töhfə verir.
“Bu uğurlu əməkdaşlığın gələcəkdə də davam edəcəyinə inanır, hər iki quruma fəaliyyətlərində yeni nailiyyətlər arzulayıram”, - deyə professor vurğulayıb.
Medianın İnkişafı Agentliyinin (MEDİA) İcraçı direktoru Əhməd İsmayılov çıxışında Bakı Dövlət Universitetində keçirilən tədbirlərin birində xüsusi auditoriya ideyasının səsləndirildiyini xatırladıb. O qeyd edib ki, xüsusi auditoriyaların yaradılması bundan sonrakı tədbirlərdə də tələbələr üçün ciddi stimul olacaq. “Bu cür layihələr gənclərin peşəkar inkişafına, media mühitinə daha yaxından inteqrasiyasına mühüm töhfə verir. Mən əminəm ki, bu iş gələcəkdə də ardıcıl və davamlı şəkildə inkişaf edəcək”, - deyə Ə.İsmayılov vurğulayıb.
AZƏRTAC-ın bu ideyanı uğurla reallaşdıraraq onu praktik və faydalı bir layihəyə çevirdiyini vurğulayan Ə.İsmayılov deyib: “Bu təşəbbüs həm xoş xatirələr yaradır, həm də çox uğurlu bir təcrübə kimi yadda qalır”.
Azərbaycan Mətbuat Şurasının sədri Rəşad Məcid AZƏRTAC-ın xüsusi auditoriyasının uğurlu bir ideyanın gerçəkləşməsinin davamı kimi qiymətləndirərək deyib: “Bu təşəbbüsün əsasında təcrübəli ziyalılarımızın, ağsaqqallarımızın dəyərli tövsiyələri dayanır. BDU-nun Jurnalistika fakültəsinin tələbələrinin hər zaman ürəyindən AZƏRTAC-da çalışmaq arzusu keçib. Bu arzu təsadüfi deyil. Gənclərin AZƏRTAC-da fəaliyyət göstərməsi onların peşəkar formalaşması baxımından olduqca uğurlu və səmərəli nəticələr verir. Bu uğurlu əməkdaşlığın gələcəkdə də davam edəcəyinə və daha geniş miqyas alacağına inanırıq”.
Azərbaycan Respublikası Audiovizual Şurasının Aparat rəhbəri Fazil Novruzov isə bildirib ki, medianın peşəkar kadrlara hər zaman ehtiyacı var. Bu auditoriyaların hər biri məhz bizim tələbələrimiz üçün nəzərdə tutulub və onların bilik, bacarıq və peşəkarlıq səviyyəsinin yüksəldilməsinə xidmət edəcək.
Bölmənin digər xəbərləri
