Bakı Limanının Bərə terminalında vaqon aşırılması 2,7 faiz artıb
Bakı, 27 yanvar, AZƏRTAC
2019-cu ildə “Bakı Beynəlxalq Dəniz Ticarət Limanı” QSC-nin Bərə terminalında vaqon aşırılması 2018-ci ilə (42 min 999 ədəd) nisbətən 2,7 faiz artaraq 44 min 175 ədədə çatıb.
QSC-dən AZƏRTAC-a bildirilib ki, bunlardan 20 min 331 vaqon (46 faiz) Bakı-Kurık-Bakı istiqamətində, 23 min 802 (53,9 faiz) Bakı-Türkmənbaşı-Bakı istiqamətində, 42 vaqon (0,1 faiz) isə Bakı-Aktau-Bakı istiqamətində hərəkət edib. Ötən il Bakı Limanının xidmətlərindən istifadə edən sərnişinlərin sayı 46 min 265 nəfər olub.
Qeyd edək ki, 2010-cu ilin noyabrında dövlətimizin başçısının iştirakı ilə Ələtdə yeni liman kompleksinin təməli qoyulub. 2014-cü ilin sentyabrında liman qurğularından biri - iki körpüdən ibarət bərə terminalı, 2018-ci ilin yanvarında iki körpüdən ibarət olan Ro-Ro terminalı, həmin ilin mayın 14-də isə Yeni Bakı Limanı istifadəyə verilib. Liman 117 hektar ərazini əhatə edir və 12 yanalma körpüsünə malikdir. Limanın yükaşırma imkanı illik 15 milyon ton yük, o cümlədən 100 min konteyner təşkil edir. Bütün inşa işləri bitdikdən sonra liman mövcud 17 körpüsü ilə 25 milyon ton yük, o cümlədən 500 min konteyner yük aşıra biləcək.
Bölmənin digər xəbərləri
