BAKI SLAVYAN UNİVERSİTETİNDƏ “YERLİ ÖZÜNÜİDARƏ” GÜNÜ
Dekabrın 13-də Bakı Slavyan Universitetində “Yerli özünüidarə” günü keçirilmişdir. Professor-müəllim heyətinin gizli səsvermə yolu ilə seçdiyi 14 tələbə və magistrant saat 9-dan 19-dək rektorun, prorektorların, dekanların, professor və dosentlərin səlahiyyətlərini icra etmişdir.
Bu təşəbbüs BSU-nun rektoru, professor Kamal Abdullayevə məxsusdur və respublikada ilk dəfə həyata keçirilir.
BSU-nun “yeni rəhbərləri” auditoriyaları gəzmiş, tələbələrə mühazirələr oxumuş, seminar məşğələləri aparmış və qiyabi şöbənin dinləyicilərindən imtahan götürmüşlər.
Təhsil nazirinin müavini Elmar Qasımov başda olmaqla nazirliyin bir qrup məsul işçisi “yerli özünüidarə” gününə yekun vuraraq, təşəbbüsü yüksək qiymətləndirmişlər.
Onların fikrincə, bu tədbir tələbələrin indi çox zəruri olan savadlı inzibatçılıq səriştəsinə yiyələnməsinə kömək edəcəkdir.
Elmar Qasımov tələbələrlə söhbətində xüsusi vurğulamışdır ki, ölkə rəhbərliyi ali məktəb tələbələrinə və gənc mütəxəssislərə həmişə diqqət yetirmişdir və bundan sonra da lazımi qayğı göstərəcəkdir.
Bölmənin digər xəbərləri
