Bakı-Tbilisi-Qars dəmir yolunun açılışı İspaniya mətbuatının da diqqət mərkəzindədir
Madrid, 31 oktyabr, AZƏRTAC
İspaniyanın EFE informasiya agentliyinə istinad edən bu ölkənin mətbuatı Bakı-Tbilisi-Qars dəmir yolunun açılışı haqqında yazır.
AZƏRTAC xəbər verir ki, “El Confidencial” nəşrində dərc edilən “Türkiyə, Azərbaycan və Gürcüstan liderləri Bakı-Tbilisi-Qars dəmir yolunu açdılar” sərlövhəli məqalədə layihənin böyük iqtisadi əhəmiyyətindən danışılır.
Məqalədə Azərbaycan Prezidenti İlham Əliyevin Bakı-Tbilisi-Qars dəmir yolunun açılış mərasimindəki çıxışına xüsusi diqqət ayrılıb. Azərbaycan dövləti başçısının Bakı-Tbilisi-Qars dəmir yolunu Avropa və Asiya arasında ən qısa yol adlandıraraq onu sabitlik və təhlükəsizliyin təminatçısı kimi səciyyələndirməsi xüsusi vurğulanıb.
İspaniya nəşri Türkiyə Prezidenti Rəcəb Tayyib Ərdoğanın da açılış mərasimindəki nitqindən sitatlar verib. Qeyd olunur ki, Rəcəb Tayyib Ərdoğan bu yol sayəsində qatarların Pekindən Londona hərəkət edə biləcəklərini xatırladıb.
Məqalədə Bakı-Tbilisi-Qars dəmir yolunun texniki göstəriciləri və daşıma imkanları haqqında ətraflı məlumat verilib.
Aygün Əliyeva
AZƏRTAC-ın xüsusi müxbiri
Madrid
Bölmənin digər xəbərləri
