Bakıda Aleksandr Şarovskinin quruluşunda “Üç gözəl” tamaşasının premyerası olacaq
Bakı, 10 yanvar, AZƏRTAC
Yanvarın 13-də Səməd Vurğun adına Azərbaycan Dövlət Akademik Rus Dram Teatrının səhnəsində Azərbaycanın Xalq artisti Aleksandr Şarovskinin quruluşunda Valentin Krasnoqorovun pyesi əsasında “Üç gözəl” tamaşasının premyerası olacaq.
AZƏRTAC xəbər verir ki, adi bir günün sevgi axtarışı üçün dönüş nöqtəsinə çevrilməsi barədə lirik hadisələri səhnədə Xalq artisti Ayan Mirqasımova, Əməkdar artist Mələk Abbaszadə, aktrisa Mədinə Mollayeva canlandıracaq.
“Üç gözəl” tamaşasının qəhrəmanları - üç rəfiqə ağıllı, gözəl, lakin tənha qadınlardır. Onlar öz talelərini kökündən dəyişmək və həyat yoldaşı tapmaq qərarına gəlirlər. Lakin onlar “aradüzəldən”lərə deyil, müasir texnologiyalara, internetə üz tuturlar. Axı, hadisələr bizim günlərdə baş verir.
Tamaşanın dekorasiyalar üzrə rəssamı Əməkdar mədəniyyət işçisi Aleksandr Fyodorov, geyim üzrə rəssamı Əməkdar mədəniyyət işçisi Olqa Abbasova, musiqi tərtibatçısı isə Əməkdar mədəniyyət işçisi Vladimir Neverovdur.
Bölmənin digər xəbərləri
