İnformasiya və kommunikasiya texnologiyaları (İKT) sahəsində ABŞ-Azərbaycan arasında biznes əlaqələrini genişləndirmək məqsədi daşıyan forumu ABŞ-Azərbaycan Ticarət Palatasının həmsədrləri Ceyms Beyker və Riza Vəziri açaraq tədbirin əhəmiyyətini vurğulamışlar.

Azərbaycan rabitə və informasiya texnologiyaları naziri Əli Abbasov ölkəmizdə informasiya texnologiyaları və kommunikasiya sahəsində görülən işlərdən, həyata keçirilən layihələrdən, sərmayə imkanlarından danışmışdır.

Ölkə iqtisadiyyatının hazırkı vəziyyəti barədə məlumat verən nazir bildirmişdir ki, Azərbaycanın son illərdəki iqtisadi inkişaf sürəti bütün dünyanın diqqətini cəlb etmişdir. Respublikamızda ötən il iqtisadi artım 26 faiz təşkil etmiş, bu il isə 35-40 faiz olacağı gözlənilir.

Azərbaycan iqtisadiyyatına hər il təxminən 5-7 milyard ABŞ dolları məbləğində xarici sərmayə qoyulduğunu diqqətə çatdıran Ə.Abbasov demişdir ki, iqtisadi siyasətimizn əsas məqsədi ölkədə davamlı və dayanıqlı iqtisadi inkişafı təmin etməkdir. Bunun üçün əsas istiqamət qeyri-neft sektorunun inkişaf etdirilməsidir.

Nazir bu istiqamətdə İKT-nin böyük rol oynadığını bildirmişdir. Bu sektoru gələcək iqtisadi imkanlarımızın prioritet istiqaməti hesab edən Azərbaycan hökuməti, şəxsən Prezident İlham Əliyev sahənin inkişafına böyük diqqət yetirir. Təsadüfi deyil ki, dövlətimizin başçısının cari ilin aprelində ABŞ-a rəsmi səfərindən sonra Birləşmiş Ştatlara göndərdiyi ilk nümayəndə heyəti ölkələrimizin İKT sahəsində əməkdaşlığının yeni mərhələsini qurmaq kimi vacib bir vəzifəni qarşıya qoymuşdu.

Ə.Abbasov artıq 8 aydır ki, Azərbaycan Respublikası ilə ABŞ arasında İKT sahəsində əməkdaşlığın genişləndirilməsini təmin edəcək hökumətlərarası rəsmi sənədin - Anlaşma Memorandumunun üzərində işləndiyini diqqətə çatdırmışdır.

Azərbaycan iqtisadiyyatında enerji sektorundan sonra İKT-nin ən dinamik inkişaf edən bölmə olduğunu vurğulayan nazir bu sektorda illik artımın 35-40 faiz olduğunu demişdir. Bu rəqəm dünya üzrə orta göstəriciləri 2-3 dəfə ötüb keçir. İKT sektoruna ildə 100-150 milyon dollar sərmayə qoyulur ki, bunun da 80 faizi yerli kapitalın payına düşür.

Bu sektora yönəlmiş birbaşa xarici sərmayələrin həcminin aşağı olmasının rəqabət mühitinin, tənzimləmə proseduralarının, hüquqi bazanın formalaşmasındakı müəyyən problemlərlə bağlı olduğunu vurğulayan Ə.Abbasov, bu səbəbdən informasiya və kommunikasiya texnologiyaları üzrə milli strategiyanın və Azərbaycan Respublikasında rabitə və informasiya texnologiyalarının inkişafı üzrə Dövlət Proqramının (2005-2008) qəbul edildiyini demişdir. Bu sahədə islahatlar özəlləşdirmənin davam etdirilməsi, bazarda liberallaşmanın aparılması, sərbəst tənzimləyici qurumun mərhələ ilə yaradılması kimi üç əsas istiqamətdə həyata keçirilir.

Bu işlərdə beynəlxalq təşkilatların, o cümlədən Dünya Bankının, BMT-nin İnkişaf Proqramının, ABŞ-ın Ticarət və İnkişaf Agentliyinin, digər təşkilatların iştirakı təmin edilmişdir. Elektron hökumət, yeni poçt sistemi, virtual İpək Yolu, fiberoptik kanal üzərində qurulan magistral informasiya şəbəkəsi, orta məktəblərdə informasiya texnologiyalarının tətbiqi, rəqəmsal televiziya sisteminin qurulması və s. kimi irimiqyaslı layihələrin həyata keçirilməsinə başlanmışdır.

Lakin bütün bunların ölkədə davamlı iqtisadiyyatın qurulması üçün kifayət etmədiyini bildirən Ə.Abbasov, bu səbəbdən də Prezident İlham Əliyevin rəhbərliyi altında dövlətimizin Azərbaycanda xüsusi iqtisadi və texnoloji zonaların yaradılması kimi böyük layihələrin həyata keçirilməsini vacib hesab etdiyini diqqətə çatdırmışdır. Bu məqsədlə beynəlxalq ekspertlər qrupunun köməyi ilə hökumətə təqdim edilmək üçün tövsiyələr toplusu hazırlanır. Bu tövsiyələr innovasiya sahibkarlığına təkan verəcək texnoparkların, elektron avadanlığın və proqram məhsullarının istehsalı və ixracı üzrə regional bazarın, ölkə daxilində əhalinin müasir infokommunikasiya xidmətlərindən istifadəsinin təşkili üçün infrastrukturun, region ölkələrinə elektron xidmətlərin göstərilməsinə imkan verəcək Qərb ilə Şərq arasında tranzit informasiya məkanının və insan resurslarının inkişafına xidmət edəcək beynəlxalq informasiya texnologiyaları universitetinin yaradılmasına dair layihələrin həyata keçirilməsini əhatə edir.

Azərbaycan bu layihələrin həyata keçirilməsində ABŞ hökuməti və şirkətləri ilə əməkdaşlığa xüsusi diqqət yetirir. Bu, bir tərəfdən, onunla bağlıdır ki, İKT-nin vətəni Birləşmiş Ştatlardır. ABŞ şirkətlərinin istehsal və investisiya potensialı digər ölkələrlə müqayisədə xeyli yüksəkdir. Ən əsası isə indi Azərbaycan ilə ABŞ arasında münasibətlərin yüksək səviyyədə olmasıdır. Bu münasibətlər iqtisadi əməkdaşlıq üçün etibarlı təməl rolunu oynayır. Bu amil Bakı-Tbilisi-Ceyhan neft kəmərinin istifadəyə verilməsi ilə təsdiq edilmişdir.

İqtisadi inkişaf nazirinin müavini Mikayıl Cabbarov Azərbaycanın iqtisadi inkişaf göstəriciləri haqqında danışmış, həyata keçirilən irimiqyaslı layihələri qeyd etmişdir. O bildirmişdir ki, sürətli iqtisadi inkişaf nəticəsində Azərbaycan regionun liderinə, Bakı isə iqtisadi mərkəzinə çevrilmişdir.

ABŞ-Azərbaycan münasibətlərindən söz açan Birləşmiş Ştatların ölkəmizdəki səfiri, xanım Ann Ders demişdir ki, onun ölkəsi Azərbaycan ilə əməkdaşlığı yüksək qiymətləndirir. Prezident İlham Əliyevin cari ilin aprelində ABŞ-a rəsmi səfəri əməkdaşlığımızda yeni səhifə açmışdır.

ABŞ-ın Azərbaycan ilə əməkdaşlığının əsasən üç sahəni - təhlükəsizlik, enerji və demokratiyanın inkişafını əhatə etdiyini diqqətə çatdıran xanım Ann Ders, terrorizmə qarşı mübarizədə Azərbaycanın fəal iştirakının Birləşmiş Ştatlarda yüksək qiymətləndirildiyini demişdir. Bu mübarizəyə ilk qoşulan ölkələrdən olan Azərbaycan hərbçiləri Əfqanıstanda, İraqda və Kosovoda sülhün təmin olunmasında yaxından iştirak edirlər.

Bakı-Tbilisi-Ceyhan layihəsini ölkələrimizin enerji sahəsində əməkdaşlığının gözəl nümunəsi kimi səciyyələndirən səfir, hazırda Xəzər hövzəsi enerjidaşıyıcılarının Azərbaycandan Avropaya nəqli məsələsinin gündəlikdə olduğunu demişdir.

A.Ders ABŞ-ın Azərbaycanda demokratiyanın inkişafını dəstəklədiyini bir daha bəyan etmişdir.

Sonra rabitə və informasiya texnologiyaları naziri Əli Abbasov və Birləşmiş Ştatların Bakıdakı səfiri, xanım Ann Ders Azərbaycan ilə ABŞ arasında İKT sahəsində əməkdaşlığa dair Anlaşma Memorandumunu imzalamışlar.

Ə.Abbasov bildirmişdir ki, sənəd Azərbaycan və ABŞ hökumətlərinin ölkələrimiz arasında İKT sahəsində əməkdaşlığın möhkəmləndirilməsində daha çox səy göstərmələrinə imkan yaradacaqdır.

Fasilədən sonra forumda nümayəndələri iştirak edən “Harris Corporation”, “Science Applications İnternational Corporation” (SAIC), “Symantec Corporation”, “Lockheed Martin”, “Trimble Navigation”, “Omni Communications” “HP”, “ORACLE” və “Booz Allen Hamilton” şirkətlərinin təqdimatı olmuşdur.