Bakıda Beynəlxalq Ailə Gününə həsr edilən konfrans keçirilib
Bakı, 15 may, AZƏRTAC
Mayın 15-də Bakıda Beynəlxalq Ailə Gününə həsr edilən “Ailənin sosial və psixoloji funksiyalarının möhkəmləndirilməsində mütaliənin yeri və rolu” mövzusunda konfrans keçirilib.
Konfrans Ailə, Qadın və Uşaq Problemləri üzrə Dövlət Komitəsi və Azərbaycan Respublikasının Prezidenti yanında Bilik Fondunun birgə təşkilatçılığı ilə həyata keçirilən “Ailəliklə kitabxanaya” layihəsi çərçivəsində baş tutub.
AZƏRTAC xəbər verir ki, konfransda çıxış edən Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva Beynəlxalq Ailə Gününün keçirilməsinin əhəmiyyəti haqqında danışıb. Qeyd edib ki, bu günün qeyd edilməsində əsas məqsəd dünya ictimaiyyətinin diqqətini müasir ailə ilə bağlı problemlərə cəlb etməkdir. Bu aksiya planetimizdə yaşayan bütün insanların diqqətini bir daha ailə problemlərinin həllinə yönəltməyə xidmət edir.
Komitə sədrinin müavini qeyd edib ki, Azərbaycanın tarixən gözəl ailə ənənələri var və bu ənənələr indiyədək qorunub saxlanılır. Bugünkü nəslin üzərinə düşən ən böyük məsuliyyət isə bu ənənələri gələcək nəsillərə çatdırmaqdır.
Azərbaycan Respublikasının Prezidenti yanında Bilik Fondunun icraçı direktoru Oktay Səmədov, Milli Məclisin deputatı Məlahət İbrahimqızı və digər çıxış edənlər layihənin önəmi barədə məlumat veriblər. Bildirilib ki, layihə ailədə mütaliə ənənəsinin təbliği və gücləndirilməsi, mütaliə vasitəsilə ailənin sosial və psixoloji funksiyalarının möhkəmləndirilməsi, bədii, klassik, müasir, elmi-kütləvi ədəbiyyatın gənclər və valideynlər arasında təbliği və eləcə də asudə vaxtın mənalı, səmərəli və düzgün nizamlanması baxımından əhəmiyyətlidir. Layihə çərçivəsində, həmçinin ailəvi mütaliə vasitəsilə ailə mədəniyyətinin formalaşdırılması məqsədilə ailələri birləşdirən bir məkan olaraq ailə klubunun təşkili nəzərdə tutulur.
Konfransda qeyd edilib ki, ailə bütün zamanlarda cəmiyyətin ən müqəddəs təməl daşı hesab olunur. Azərbaycan xalqının dərin ailə ənənələri mövcuddur. Cəmiyyətimizdə ailə həmişə müqəddəs sayılıb. Ulu öndər Heydər Əliyevin hakimiyyətə qayıdışından sonra dövlət ailə siyasətinin təməli qoyulub. Hazırda bu siyasət Prezident İlham Əliyev tərəfindən uğurla davam etdirilir. Bu gün ailə məsələləri həm dövlətin, həm də cəmiyyətin önəm verdiyi ən əsas məsələlərdən, prioritet istiqamətlərdən biridir.
Bölmənin digər xəbərləri
