BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 19 aprel (AZƏRTAC). Aprelin 18-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada şənbə və bazar günləri Sabirabad, Gədəbəy, Hacıqabul və digər rayonlardan gətirilmiş
11 tondan çox məhsul, o cümlədən 2 ton ət, 0,4 ton ağartı, 3,5 ton tərəvəz, 3 ton kartof, 2,5 ton meyvə, 2,5 min ədəd yumurta satılmışdır. Qiymətlər bazardakından 20-25 faiz ucuz olmuşdur.
Kənd Təsərrüfatı Nazirliyinin nümayəndəsi Saleh Zərbəliyevin verdiyi məlumata görə, Bakı Rabitə və Nəqliyyat Kollecinin həyətindəki yarmarkada Salyan, Quba, Şabran, Qusar, Astara rayonlarının fermerləri və şəxsi təsərrüfat sahibləri iki gün ərzində 79,6 ton məhsul satmışlar. Bütün məhsullar bazarlardakından 30-40 faiz, bəziləri isə yarıbayarı ucuz təklif olunmuşdur.
Şənbə və bazar günləri metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada Ağcabədi, Şəmkir, Quba, Kürdəmir, Qax və Biləsuvar fermerləri bazardakından xeyli ucuz qiymətə 187 ton meyvə-tərəvəz, ət və digər məhsullar satmışlar.
Suraxanıda “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində təşkil olunmuş yarmarkalarda şəhər sakinlərinə iki gün ərzində Samux, Daşkəsən, Quba, Biləsuvar, Balakən və Cəlilabad rayonlarından gətirilmiş 35 tondan artıq məhsul satılmışdır.
Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə, məhsulun bolluğu və çeşidlərin müxtəlifliyi qiymətlərə də təsir göstərmişdir. Məhsullar alıcılara bazarlarla müqayisədə 20-25 faiz ucuz təklif olunmuşdur. Hər iki yarmarkada məhsulların keyfiyyəti ciddi surətdə yoxlanılmış, ət və süd məhsulları baytar müayinəsindən keçirilmişdir.
Şənbə və bazar günləri Biləcəri qəsəbəsi, 284 nömrəli məktəbin yaxınlığında, Binəqədi rayonu 6 nömrəli Bakı Texniki Peşə Liseyinin qarşısındakı yarmarkalarda Qazax, Ağsu, Ağstafa, Bərdə və Goranboy fermerləri sakinlərə 11 tondan çox meyvə-tərəvəz və bostan məhsulları satmışlar.
Nərimanov rayonu Ə.Əliyev küçəsindəki yarmarkada iki gündə Xaçmaz, Tovuz, Daşkəsən, Astara, İmişli, Neftçala, Oğuz və Beyləqan rayonlarının fermerləri 17,5 ton məhsul, Giləzi broyler fabrikinin nümayəndələri isə 20 min ədəd yumurta satmışlar.
Bölmənin digər xəbərləri
