Azərbaycan Milli Elmlər Akademiyası yer elmləri bölməsinin mətbuat xidmətindən
AZƏRTAC-a bildirmişlər ki, avqustun 6-da Bakıdakı “Azərbaycan” mehmanxanasında NATO-nun elm şöbəsi ilə AMEA-nın Geologiya İnstitutu “Urbanlaşmış ərazilərdə yeraltı suların idarə edilməsi və davamlı inkişafı” mövzusunda elmi konfrans – seminar keçirəcəklər. Ayın 15-dək davam edəcək tədbir antropogen faktların ətraf mühitə, xüsusilə də hidrogeologiyaya, yəni yeraltı sulara və onların səbəb olduğu sürüşmələrə, suyun keyfiyyətinin dəyişməsinə, seysmik təhlükənin artmasına və bu kimi problemlərə həsr olunacaqdır. Həmin məsələlər yalnız Azərbaycanın deyil, bütün dünyanın problemləri kimi müzakirə ediləcəkdir. Seminarın həmsədrləri Böyük Britaniyanın Birmingem Universitetinin professoru Con Tellam və Geologiya İnstitutunun professoru Rauf İsrafilovdur.
Seminarda, həmçinin NATO-ya üzv olan 11 dövlətdən və 7 tərəfdaş ölkədən 60 nümayəndə, o cümlədən Ekologiya və Təbii Sərvətlər Nazirliyi, Meliorasiya və Su Təsərrüfatı Komitəsi, Bakı Dövlət Universiteti və Azərbaycan Dövlət Neft Akademiyasının nümayəndələri iştirak edəcəklər. Bəzi xarici ölkələrin Azərbaycandakı səfirləri də tədbirə dəvət olunmuşlar.
Xatırladaq ki, NATO ilə bu mövzuda tədbir ölkəmizdə ikinci dəfədir ki, təşkil olunur. Bundan əvvəlki seminar 2001-ci ilin mayında keçirilmişdir.
