BAKIDA QİƏT PARLAMENT ASSAMBLEYASININ MƏDƏNİYYƏT, TƏHSİL VƏ SOSİAL MƏSƏLƏLƏR KOMİTƏSİNİN İCLASI KEÇİRİLMİŞDİR
Sentyabrin 25-də Milli Məclisdə Qara Dəniz İqtisadi Əməkdaşlıq Təşkilatı Parlament Assambleyasının Mədəniyyət, təhsil və sosial məsələlər komitəsinin 19-cu iclası keçirilmişdir.
İclas başlanmazdan əvvəl 7 ölkədən gəlmiş heyətlərinin üzvləri Şəhidlər xiyabanıni ziyarət edərək, Azərbaycanın müstəqilliyi və ərazi bütövlüyü uğrunda canlarından keçmiş qəhrəmanların məzarları üzərinə gül dəstələri qoydular.
Sonra iclas başladı. Əvvəlcə Komitənin sədri Malxaz Baramidze çıxış etdi. O dedi ki, QİƏT Parlament Assambleyasının əvvəlki tədbirləri - teleradio şirkətləri rəhbərlərinin bu ilin mayında Yunanıstanda keçirilmiş görüşü, uşaqların və yeniyetmələrin Soçidə keçirilmiş ikinci festivalı, habelə universitetlərin nümayəndələrinin Bakı görüşü təşkilatın üzvü olan ölkələrin xalqlarının yaxınlaşmasında böyük rol oynamışdır. O, Komitənin martın 26-27-də Sofiyada keçirilmiş 17-ci iclasının yekunlarını yüksək qiymətləndirdi.
Milli Məclis sədrinin müavini Ziyafət Əsgərov iclas iştirakçılarını Azərbaycan parlamentinin rəhbərliyi adından salamladı. O, vurğuladı ki, keçmiş Sovet İttifaqının digər dövlətləri kimi, Azərbaycan da müstəqillik əldə etdikdən sonra ciddi sosial-iqtisadi problemlərlə üzləşmişdir. Ən mühüm problemlərdən biri olan əhalinin məşğulluğunun təmin edilməsidir. Azərbaycan ərazisinin 20 faizdən çoxunun Ermənistan tərəfindən işğalı nəticəsində 300 minə yaxın iş yerinin itirilməsi vəziyyəti daha da çətinləşdirmişdir. O, Komitənin iclasında müzakirə olunacaq əhalinin miqrasiyası problemini də ciddi məsələ kimi adlandırdı. Parlament sədrinin müavini əhalinin sosial müdafiəsinin gücləndirilməsinə dair qanunvericilik bazasının yaradılması məsələsi üzərində də dayandı.
Əmək və əhalinin sosial müdafiəsi nazirinin müavini Şəmsəddin Xanbabayev Azərbaycan əhalisinin sosial vəziyyətinin yaxşılaşdırılması sahəsində görülən tədbirlər barədə məlumat verdi.
Sonra iclasın gündəliyini təsdiq olundu. Gündəliyə Komitənin 17-ci iclasının protokolunun təsdiq edilməsi, “İşsizlərin sosial reinteqrasiyası haqqında” tövsiyənin layihəsi barədə məsələlər, habelə təşkilat məsələləri daxil edilmişdir. Rumıniya nümayəndəsi Dumitru Buzatu QİƏT-in üzvü olan ölkələrdə işsizlərin sosial reinteqrasiyası məsələsinə dair məruzə etdi. Daha sonra QİƏT PA-nın Baş Assambleyasında bu mövzuda çıxış edəcək məruzəçi təyin olundu. Bu mühüm məsələ barədə də Komitənin sədri Malxaz Baramidze çıxış etdi. Onun çıxışından sonra tövsiyələr layihəsi yekdilliklə qəbul olundu.
İclasda QİƏT Parlament Assambleyasının 2003-rü ildə uşaqların və yeniyetmələrin festivalının keçirilməsi üzrə təşkilat komitəsinin sədri Syux Tanıkanın məlumatı dinlənildi.
Sonda təşkilat məsələsinə baxıldı. Azərbaycan nümayəndəsi Şaitdin Əliyev Komitənin yeni sədri, Rumıniya nümayəndəsi Dumitru Buzatu isə onun müavini seçildilər.
İclasdan sonra mətbuat konfransı keçirildi.
Bölmənin digər xəbərləri
