BAKIDA REGİONAL ŞƏBƏKƏ AKADEMİYASI AÇILMIŞDIR
“Lokal və qlobal şəbəkə inzibatçıları hazırlayan Regional Akademiya” layihəsinin həyata keçirilməsinə dair BMT Inkişaf Proqramı, YUNESKO VƏ Azərbaycan hökumətinin 2001-ci ilin iyulunda imzaladıqları sazişə uyğun olaraq, iyunun 11-də Regional şəbəkə akademiyasının təqdimat mərasimi olmuşdur.
Bakı elm və tədris mərkəzinin direktoru Tofiq Babayev təqdimat mərasimində çıxış edərək, dördüncü mərhələsi məhz Regional şəbəkə akademiyasının açılışı olan həmin layihənin həyata keçirilməsi barədə ətraflı məlumat vermişdir. Bildirilmişdir ki, bu layihə çərçivəsində CISCO sistemləri Regional akademiyası, Microsoft firmasının rəsmi sertifikat almış tədris mərkəzi və Silvan Premefric firmasının test mərkəzi açılmışdır. İnformasiya-kommunikasiya texnologiyaları sahəsində tanınmış bu firmalar Regional şəbəkə akademiyasında təmsil olunacaqlar və burada Azərbaycan mütəxəssisləri ilə yanaşı, MDB ölkələrinin mütəxəssisləri də təlim keçəcəklər.
Layihənin baş sponsoru olan BMT İnkişaf Proqramı nümayəndələrinin sözlərinə görə, Regional şəbəkə akademiyasının açılışı Azərbaycan hökumətinin İnformasiya-kommunikasiya texnologiyalarına dair milli strategiyasının tərkib hissəsidir.
Təqdimat mərasimində BMT-nin rezident- əlaqələndiricisi, BMT İnkişaf Proqramının Azərbaycandakı nümayəndəsi Marko Borsotti, BMT İnkişaf Proqramının və Azərbaycan hökumətinin İnformasiya-kommunikasiya texnologiyaları üzrə milli strategiyası layihəsinin milli əlaqələndiricisi Məleykə Abbaszadə iştirak etmişlər.
Bölmənin digər xəbərləri
