İQTİSADİYYAT
Bakıda sığorta agentlərinin birinci milli forumu keçirilmişdir
Bakı, 7 dekabr (AZƏRTAC). Dekabrın 7-də Bakıda Maliyyə Nazirliyinin Dövlət Sığorta Nəzarəti Xidmətinin və Azərbaycan Sığortaçılar Assosiasiyasının birgə təşkilatçılığı ilə sığorta agentlərinin birinci milli forumu keçirilmişdir.
AZƏRTAC xəbər verir ki, forumda son zamanlar sığorta agentlərinin fəaliyyətində müşahidə olunan problemlərin aradan qaldırılması yolları, onların fəaliyyətinin tənzimlənməsi məsələləri müzakirə edilmişdir.
Açılışda Maliyyə Nazirliyinin Dövlət Sığorta Nəzarəti Xidmətinin rəisi Namiq Xəlilov “İcbari sığortalar haqqında” Qanun barədə məlumat vermiş, sığorta agentlərinin fəaliyyətindən, bu sahədə mövcud problemlərdən və qarşıda duran vəzifələrdən danışmışdır.
Bildirilmişdir ki, bu qanun qüvvəyə mindikdən sonra sığorta agentlərinin xidmətlərinə tələbat xeyli artmış, sığorta agenti fəaliyyəti icbari sığorta müqavilələrinin bağlanılmasının təmin edilməsində əhəmiyyətli fəaliyyət növü kimi seçilməyə başlamışdır.
Forumda “Sığorta agenti fəaliyyətində mövcud problemlər. Dövlət nəzarəti və perspektivlər”, “Sığorta agenti fəaliyyətinin hüquqi tənzimlənməsi”, “İcbari Sığorta Bürosu: məqsəd və funksiyalar. İnformasiya sistemi və sığorta agentləri tərəfindən informasiya sisteminə məlumatların daxil edilməsi zamanı yol verilən nöqsanlar” mövzularında çıxışlar dinlənilmişdir.
Qeyd olunmuşdur ki, hazırda Azərbaycanda 600 nəfərdən çox sığorta agenti fəaliyyət göstərir. Bunlardan 46-sı hüquqi şəxs, 597-si fiziki şəxsdir. Sığorta agentlərinin sayı illər üzrə dəyişmişdir. Ölkədə sığorta agenti fəaliyyətinə ilk lisenziyalar 2009-cu ildən verilməyə başlamışdır. 2012-ci ildə sığorta agentlərinin sayında 2 dəfə artım müşahidə olunmuşdur. Cari ildə hüquqi şəxslərin sayı 20 nəfər, fiziki şəxslərin sayı isə 240 nəfər olmuşdur. Sığorta agentlərinin sayına qanunvericilikdə heç bir məhdudiyyət qoyulmamışdır. Sığorta bazarı inkişaf etdikcə, yeni qanunvericilik aktları qəbul edildikcə sığorta agentlərinin xidmətinə də tələbat artacaq, bu sahə getdikcə inkişaf edəcəkdir.
Vurğulanmışdır ki, 2012-ci ilin 9 ayında avtonəqliyyat vasitəsi sahiblərinin mülki məsuliyyətinin icbari sığortası üzrə zərərlilik 46,82 faizə çatmışdır. Bu göstəricinin artmasının əsas səbəblərindən biri də sığorta şirkətləri sığorta agentlərinə komissiyanı qanunla müəyyən olunmuş həddən artıq məbləğdə verməyə başlamışdılar. Bu ödəmələr 20-25 faizə, hətta 30 faizə çatırdı. Halbuki qanunvericiliyə uyğun olaraq bu növ üzrə komissiya ödəmələri 15 faizi ötməməlidir. DSNX sığorta şirkətlərinə yazılı xəbərdarlıqlar göndərdi, Dövlət Xidmətinin əməkdaşları regionlarda reydlər keçirirlər. Belə faktların əksəriyyətinin qarşısının alınmasına baxmayaraq, hələ də belə hadisələr haqqında xidmətə informasiya daxil olur.
Forumda, həmçinin “Azərbaycan Respublikasında agent fəaliyyətinin inkişafı, agent bazarının əhəmiyyəti, inkişaf amilləri, müsbət və mənfi cəhətlərinin təhlili”, “Sığorta agenti fəaliyyəti ilə bağlı problemlər və təkliflər” və s. mövzularda çıxışlar olmuş, müzakirələr aparılmışdır.